ANG kapistahan ni Senyor Santo Niño mao na sab ang gitutukan sa kapulisan. Kini human sa malampuson nga pagpahigayon sa kapaskohan ug bag-ong tuig.
Gawas sa gitinguha nga pagpawong sa cell sites sa dapit nga maoy sentro sa selebrasyon, unsa pa may bag-o nga mga pamaagi pagpatigbabaw sa kahapsay ug kalinaw atol sa selebrasyon?
Dunay daghan nga gihan-ay ang kapulisan nga di sab mahimong ibutyag ngadto sa publiko. Usa sa akong nasayran mao kining pagdili pagsambilay og back pack.
Sa ato pa gitambagan kadtong mosalmot sa selebrasyon sa dili pagdala og back pack. Kon magdala mo og ilisan o personal nga gamit, isulod ni sa sudlanan nga sihag aron di mo kadudahan nga may dala nga explosibo.
Samot na kon magdala mo hinagiban ug ilimnong makahubog. Likayan sab ang pagdala anang mga gadget nga nangumbitay ang mga wiring.
Sama anang mga project nga may labot ang electronic o electrical kay mahimo man nang sabton nga usa ka matang sa mekanismo nga gamiton sa pagpaulbo og bomba.
Mas maayo nga magdala og I.D. aron kon makasugat og rekisa mas sayon nga mapaila ang imong pagka tawo. Gawas sa ID mas maayo nga apilon nimo og dala ang ubang dokumento sama sa passport alang sa mga langyaw. Kadtong gikan sa probinsiya unya mopuyo sa ilang mga paryente sa siyudad, ayaw kalimot pagpahibalo kon asa ang imong destinasyon.
Siguroa nga naka phonebook ang numero sa imong paryente para sayon ang pagtawag panahon sa emergency. Makatabang og dako kon naka phonebook sab ang numero sa police station, fire station, Red Cross ug ubang grupo nga maoy madalidali pagtawag kon dunay emerhensiya.
Ning puntoha manghangyo ta sa mga telecommunication company nga unta libre ang tawag ning maong mga opisina gamit ang cellphone bisan kon wa kay load.
Kaniadto pa ni nato gihisgutan nga unta ang emergency calls malibre sa bayranan gamit ang cellphone. Ang naandang libre mao ra man ang paggamit sa landline. Malibre man o dili atong responsibilidad pagpahibalo sa awtoridad kon dunay mga kadudahang tawo o kalihukan nga sa atong pagtuo hulga sa seguridad.
Pananglitan diha sa inyong mga sitio kon naay mga bag-ong nawong nga nag-embudo sa inyong silingan apil na sa inyong panid-an.
Basin grupo na sa mga dayo nga nia ron sa ato aron mamiktima sama sa pagpanguot, snatching, salisi ug ubang modus.
Diha bitaw estorya kaniadto nga daghang cellphone gibaligya og barato sa usa ka dapit. Kay diay ang mga kawatan nga di taga ato, nagpasilong sa usa sa mga balay didto.
Gawas sa kawatan basin mga armadong grupo ang nagpasopaso sa inyong sitio.
Ang barangay angay motabang og monitor apil na kadtong tua sa layo. Sa mga nagpuyo sa daplin sa baybayon, basin dili mga mananagat nang nidunggo. Basin mga armas nang gipuyong sa pukot nga ilang gipas-an. Daghang paagi. Daghang diskarte. Pero ang mga mata sa mga molupyo lupig pa ang kahait sa CCTV camera kana kon apilan ug pagpakabana.
***
Unya unsa may imong hikay ning kapistahan sa Senyor? Siguro ang uban nikontak na og caterer. Ang uban nag-order na og litsong baboy.
Ang uban sama sa naandan, nag-ampo pa nga dunay grasya nga moabot aron makaandam og lamian nga pagkaon.
Manghinaot ko nga front seat kanunay ang inyong mga kaliwat nga mamistahay diha sa inyong panimalay. Inay nga adto lang sila sa aseras mangligdas nga naa man diay unta mo nga ilang kapasilongan.