SI ANGELINE Tham nahimugso sa Singapore. Didto sa maong nasod nahimo siyang usa ka banker. Nibalhin sa kaulohan ug naminyo og usa ka Pilipino. Sa dihang na-late siya sa pipila ka meetings gumikan sa trapik sa Metro Manila, nakahunahuna siya sa Angkas.
Didto natawo ang ride-hailing application nga Angkas nga karon aduna nay 27,000 ka riders. Hangtod karon, wa pa ma-legalize ang operasyon sa Angkas ingon man sa libo ka libong mga habal-habal nga gihimong pasaheroan sa mga lagyong lugar sa atong nasod nga way laing kasakyan.
Apan gitugotan ang Angkas sa Department of Transportation (DOTr) kay gitun-an sa ilang technical working group ang paghimo sa motorcycle taxi nga alternative public transportation.
***
Gihimo ang unom ka buwan nga pilot testing sa Angkas gikan sa Hunyo 2019 sa Metro Manila ug Metro Cebu. Giluwagwayan sa DOTr ang pilot testing apan gilimitihan ang gidaghanon sa motorcycle taxis ngadto sa 30,000 ka buok ug gipasud ang JoyRide ug MoveIt.
Bahinon ang 30,000 sa tulo ka mga motorcycle taxi players – ang Angkas, JoyRide ug Movelt. Sa ato pa tag 10,000 silang tulo. Mawad-an og trabaho ang 17,000 sa 27,000 ka riders sa Angkas.
Ang Angkas maoy nag-una sa app-based nga motorcycle taxi. Apan niabot ang JoyRide ug Move lt ug niapil sa samang negosyo nga anaa pa sa pilot testing stage. Ingon sa nakaangkas ang JoyRide ug Move lt sa Angkas.
***
Nagkapa-kapa sa pagpanagang si Senador Aquilino Pimentel III sa iyang pag-endorso sa JoyRide. Matod pa niya, ang iyang bugtong tumong mao nga daghan ang kapilian sa mga sumasakay.
“In the name of competition — since monopolies are prohibited — I endorsed the request of one company for the DOTr to include it in the pilot testing,” matod pa ni Pimentel.
Tulo ka players aron dunay kompetisyon. Ang kompetisyon makaayo sa mga sumasakay sa mga motorcycle taxis. Apan mas daghan og kapilian ang mga sumsakay kon mahimong legal ang tanang habal-habal.