NIA NA sab ning Department of Public Works and Highways (DPWH) 7, nipasiatab sa P1.5 bilyones sa proyekto nga ipatuman sa Sugbo karong 2020. Pila kaha sa bilyunes sa tibuok rehiyon ug nasod? Pwerte kadako nga budget. Hinaut nga dili kini basta lang mapatuman tungod sa budget nga nakalusot o aprobado na bisan wala masunod ang tukma nga proseso sa proyekto.
Mabalaka nga ma-revert o mabalik ang budget sa panudlanan kon wala magasto ang budget sa proyekto sulod sa iyang sa gitaganang panahon? O kaha mahadlok nga mawad-an og laing oportunidad sa pagpangurakot? Bisan sa ani nga pangutana walay ayo. Ang katawhan maoy mag-antos. Usik ang atong buhis nga nagkataas na karon.
Sa dakbayan sa Sugbo, unsay inyong namatikdan nga kausaban ning panahon sa ting-uwan? Maayo na ang pagbul-og sa baha sa bag-ong sementadong dan Bonifacio, V. Gullas ug ubang kadalanan sa siyudad nga aspaltado nga giguba bisan maayo, apan walay gihimong pagpalambo sa sistema sa kanal. Matod pa, wala pay budget ang kanal ug nakalusot na ang budget sa pagsemento sa dalan. Ug kon molusot na ang budget sa dan, binukbokay na sad sa sementadong dan?
Sa naasoy sa taas nga mga dapit, ang drainage o kanal maoy nag-unang problem, dili pa ang dalan. Bisan ang mga yanong drayber ug sumasakay nakakomentaryo.
Mao kini ang klaro nga ehemplo sa basta na lang mapatuman ang proyekto. Mao usab kini ang tino nga pangutok sa taga DPWH (pwera sa maayo) nga gisaligan nga batid nga opinyon apan buta sa kamatuoran. Tungod sa unsa kaha? Ang publiko makatubag ani.
Karong bag-ong 2020, hinaut nga 20-20 (maayong grado sa mata) ang panglantaw ug mohimo og kabag-ohan alang sa kabulahanan sa tanan. Kalamboan sa nasod. Ang mga proyekto matuman sa tukma nga proseso ug koordinasyon.