ORMOC CITY, Leyte -- Mga traysikol sa dakbayan sa Ormoc gikinahanglan na nga "color-coded" sugod karong buwana.
Kini ang gianunsyo ni Ormoc City Mayor Richard Gomez atol sa flag raising ceremony Lunes, Enero 6, 2020.
Matod sa mayor, dapat napintalan na og "hard color" ang mga traysikol sugod sa miaging Enero 1.
“They cannot renew sa ilang lisensya if dili color-coded ang tricycles nila,” matod ni Gomez.
Dugang sa mayor nga iyang naobserbaran sa miaging mga tuig nga maglibog ang mga law enforcers kung unsa ang color sa traysikol base sa ilang rota.
“With the color-coding karon, makita nimo pag full color body, kahibawo na ka sa ilang kaugalingon nga linya, so ang blue, green, red kahibawo na ka kung asa. Pag may maligaw na isang color, kahibawo naka nga nag trip cutting to,” matod sa mayor.
Ang color-coding nga polisiya sa mga trasyikol sa dakbayan usa sa mga programa ni Gomez sa iyang ikaduha nga termino isip mayor, diin iyang gipalanog sa iyang inaugural speech nga karong tuiga, "color-coded" na ang tanan traysikol.
Aminado usab si Gomez nga dunay dakong demand sa transportasyon sa Ormoc gumikan sa grabeng pagdagsa sa mga tawo.
“Ormoc is a growing city and ang atong population is very high. Daghan ang mobisita dinhi, daghan ang nagtrabaho dinhi, so we really need ample transportation,” matod ni Gomez.
Nanawagan usab si Gomez sa Land Transportation Franchising and Regulatory Board sa paspas nga pag aprobar sa mga prangkisa sa ubang mga pampublikong sakyanan. (JKDP)