LAING mga kinarton na usab sa pork hotdog ang nakumpiska sa sa Anti-African Swine Fever Task Force sa dakbayan sa Cagayan de Oro sa depot sa Barangay Agusan.
Anaa sa 52 ka mga karton sa hotdog ug sausage nga dunay sagol karneng baboy ang nakumpiska sa task force gumikan sa hugot nga kampanya sa pagdili pagpasulod sa mga produktong baboy nga nagagikan sa bisan asa nga bahin sa Luzon nga apektado sa African Swine Fever (ASF).
Gibutyag ni city veterinarian Dr. Lucien Anthony Acac, chairman sa task force, nga usa ka 40-footer reefer van ang gikargahan sa maong mga produkto gikan sa Mindanao International Container Terminal (MICT) sa lungsod sa Tagoloan, Misamis Oriental rason nga gi-atangan ang pag-abot niini sa depot.
Padayon nga giimbestigahan sa task force ang nakumpiskang nga produkto aron pagsuta kong sunogon o ilubong ba kini.
Samtang laing 92 ka mga processed meat products ang nasakmit tungod sa kakulang sa mga dokumento sama sa certificate product registration (CPR), list of ingredients, ug uban pa.
Niadtong 2019, pipila usab ka karton sa hotdog ang nasakmit ug ang pagkasakmit sa ulo sa lechon sa pantalan.
Nasayran nga dunay ordinansa ang dakbayan sa Cagayan de Oro ug nagpadayon pa kini labi na ang temporaryo nga pag-ban sa tanang produktong baboy aron nga dili makalusot ang mga apektadong produkto sa ASF sa dakbayan.
