MAGSUGOD na karong adlawa, Enero 7, isip assistant secretary sa Office of the President si Colonel Mario Verner Monsanto, ang overseer sa City Disaster Risk Reduction Management Department (CDRRMD) sa dakbayan sa Cagayan de Oro.
Nasayran nga niduso na kini og resignation letter isip overseer sa CDRRMD sa siyudad epektibo Disyembre 31, 2019 ug pormal na nga molingkod isip assistant secretary sa buhatan sa Presidente didto sa kaulohan.
Gikompirma usab ni city administrator Teodoro Sabuga-a nga nagduso na kini og resignation letter apan andam kini nga motabang gihapon sa dakbayan.
"Nag-render napud siya og official resignation niya effective December 31 also dili na siya connected gyud sa city kay ma doble naman," matud ni Sabuga-a.
"He really wanted nga ang atong operation center maplastar gyud og ayo," dugang pa ni Sabuga-a.
Kahinumdoman nga wala magdahom si Monsanto sa bag-ong posisyon niini human niadtong Disyembre 3, 2019 giimbetahan kini og usa ka meeting apan nakurat sa dihang usa sa mga nanumpa sa bag-ong posisyon.
"Wa ko kabalo unsay position nako kay ang invitation nako meeting raman, surprise gyud," matud ni Monsanto.
Mapasalamaton usab kini tungod kay wala niini damha nga moabot niini nga posisyon sa iyang pangidaron karon apan giangkon niini nga wala pa gyud niini nasayran kung unsa ang iyang trabaho isip asec.
"First is, was to thank God, I never nga... at my age now mga makaabot ko ani na position wa gyud na nako gidamgo, ingnan nakong Ginoo nga wa man nako ni pangayoa imo man ni gihatag tabangi ko, mao na akong sulti sa iyaha," matud niini.
Gidugang pa niini nga manghinaot kini nga makatabang man lang pinaagi sa pagpaningkamot nga ma-implementar ang mga proyekto sa dakbayan ilabi na ang gipangandoy nga emergency operation center o buhatan nga anaa ang CDRMMD, emergency operation center ug buhatan sa crisis management.
"Dili ko kaingon nga mas madali pero at least there's contact, naay contact person didto," dugang pa.