KULANG sa disiplina.
Kini ang nakitang dakong problema ug buot masolusyonan sa bag-ong gitudlo nga mangulo sa Roads and Traffic Administration (RTA) sa dakbayan sa Cagayan de Oro.
Niadtong Enero 2, pormal na nga nilingkod isip acting head sa RTA ug kasamtangang acting head sa Civil Security Office, si Police Colonel Rizalino Borlagdatan, usa ka retiradong pulis.
Gibutyag ni Borlagdatan nga ang pinakadakong problema mao gyud ang kulang og disiplina.
"Gamay raman atong problema diri sa traffic, isa lang ang pinakadako ang disiplina lang gyud, kana lang po ang atong problema kay naay mga maayong laki, naay mga gusto nga sila ang masunod," matud ni Borlagdatan.
Gidugang pa niini nga nanghinaot kini nga makamugna og programa ug mahatag sa City Council nga makatabang sa paglambo sa disiplina ilabi na diha sa balaod sa kadalanan.
"I hope maka-device mi'g program or makahatag mi sa City Council kung unsay among solution nga ma-improve ang atong discipline sa rules and other concern sa amo," dugang pa.
Mapasalamaton usab kini sa lokal nga kagamhanan sa siyudad ilabi na ni Mayor Oscar Moreno nga nisalig kaniya.
Samtang naglaom si Teodoro Sabuga-a, city administrator, nga madisiplina ni Borlagdatan ang mga personahe usab nga dunay mga badlungon ug lakip ang mga pasahero nga dili mokanaog sa insaktong kanaogan ug dili usab moparking sab og tarong ang mga drayber.
"I hope nga through sa iyang leadership, madisiplina pud nato ang ato kay organization man gyud nato ang una kanang pag ingon niya nga ang problema sa traffic usa raman gyud generally disiplina man gyud which is also correct," matud ni Sabuga-a.
Gidugang pa nga ang batasan gyud sa mga sumasakay ug mga drayber ang nag-unang problema sa trapiko.
Si Borlagdatan lumad nga taga Luzon apan nadesignar sa tuig 1991 dinhi sa dakbayan ug usa ka retiradong sakop sa Philippine National Police Academy.
Niretiro kini isip police colonel sa PNP niadtong Hunyo tuig 2019 ug pinakaulahi mga gihuptang posisyon isip chief sa logistics sa Regional Office-Northern Mindanao.
Daghan na usab kining nahuptang posisyon sa dakbayan ug sa rehiyon ug pinakadugay mao isip chief of aviation security group sa airport dinhi sa dakbayan. Nasayran nga girekomendar kini ni city director Henry Dampal, sa Cagayan de Oro Police Office.