LAING pasidungog ang maangkon na usab ni boxing legend Manny Pacquiao.
Ning higayona, ang fighting senator mao na karon ang naglawig alang sa Fighter of the Year 2019 award sa World Boxing News human nga sa kalit lang misulbong ang iyang pangalan sa binutohay sa miaging siyam ka adlaw.
Si Pacquiao, kinsa tagsatagsang mipukan ni Adrien Broner ug Keith Thurman, sa sinugdanan igo lang milandig sa ikaupat nga puwesto sulod sa duha ka semana nga binutohay.
Sugod sa Disyembre 10, 2019, walo ka mga inilang boksidor ang nalista alang sa maong award.
Sikit nga nag-inilogay sa unang puwesto sila si Josh Taylor ug Canelo Alvarez, apan gipapas ang ngalan ni Taylor tungod sa pag-angkon niini sa kasong racial abuse didto sa korte sa United Kingdom (UK).
Sa pagkawagtang ni Taylor, ang Haponanon nga si Naoya Inoue maoy migukod ug mihudlat kang Canelo.
Apan pipila ka adlaw sa wa pa moabot ang Pasko, ang mga Filipino boxing fans misugod na pagpadayag sa ilang botasyon ug didto sa wala damha misulbong ang pangalan ni Pacquiao ug hangtod ning pipila na lang kaadlaw sa dili pa moabot ang awarding ceremony, dako na kaayo og bingat sa labaw si Pacquiao.
Gikatakda ang awarding ceremony karong Enero 7 ug hangtod ning pagsuwat si Pacquiao nakahagdaw na og 4,259 ka botos (79.6 porsyento) samtang nagsunod si Canelo nga may 384 votes (7.2 porsyento).
Ikatulo si Inoue, 275 votes (5.1 porsyento) ug ikaupat si Anthony Joshua nga may 169 votes; Deontay Wilder, 161 votes; Errol Spence Jr., 92 votes; ug Juan Estrada nga may 13 votes.
Samtang sa laing bahin, ang away tali ni Nonito "The Filipino Flash" Donaire ug sa undefeated Japanese dynamo nga si Naoya Inoue niadtong Nobiyembre 7, 2019 didto sa Japan maoy napiling "Fight of the Year" sa Matchboxing.
Sa maong kombati, napildi si Donaire pinaagi sa sikit nga unanimous decision, 116-111-116, 109-117 ug 113-114.
Si Inoue, 26, nagdako sa boksing nga giidolo ang 37-anyos nga si Donaire ug sa wala lang damha nag-abot ang ilang dalan sa dihang gipahigayon ang World Boxing Super Series tournament.
Sukwahi sa World Boxing News, ang Matchboxing mopili kang Canelo Alvarez nga Fighter of the Year awardee.