SUPERBALITA DAVAO

Roldan: 'GKK Servant Leaders'

Nota Bene

DILI "gagmay'ng kiat-kiat" o "gugmang kinawat-kawat." Pwedeng "guwapo kaayo ka" apan ang tinuod nga kahulogan sa GKK kay "Gagmay'ng Kristohanong Katilingban" o sa English pa, "basic ecclesial community" nga iya sa simbahang Katolika.

Matag parokya adunay mga GKK nga gipangulohan sa gitawag nga GKK Servant Leaders o GSL nga maoy kaabag sa Kura Paruko sa pagsangyaw sa maayong balita sa kaluwasan sa katawhang iyang gingsakpan.

Halos tanang aspeto sa misyon sa simbahan giabagan sa GSL nga gilangkuban sa Pangulo sa Katilingban, Pangulo sa Liturhiya, Pangulo sa Pagtudlo, Pangulo sa Alagad, Pangulo sa Kristohanong Banay ug uban pa.

Matag usa kanila adunay mga ginsakpan nga maoy modumala sa mga programa og kalihukan nga ilang gikasabutang buhaton sa ilang GKK. Ang Pangulo sa Liturhiya maoy mopahigayon sa mga kasaulogan sa ilang kapilya, novena ug mga pag-ampo sa iyang katilingban.

Ang Pangulo sa Katilingban maoy "manager" sa tanang gimbuhaton sa katilingban ug maoy unang kutay ngadto sa parokya. Ang Pangulo sa Alagad maoy nag-atiman sa mga hinanaling panginahanglan sa iyang gingsakpan sama sa panahon sa emerhinsiya, kagutom, kapobrehon ug uban pa.

Sa panahon sa martial law ni Presidente Ferdinand Marcos gidudahan ang GKK, ilabi na ang apostolado sa pag-alagad og "social action" nga iya sa komunista kay nagtabang kini sa pagpahigmata sa katawhan aron mosupak sa gobyerno.

Tungod niini, daghan ang nangamatay nga Kaparian, Kamadrihan ug Layko dili lamang sa Simbahang Katoliko kon dili hasta sa han-ay sa simbahang Prostestante. Sa panahon sa kalisod tungod sa pag-ipit sa kagamhanan, hilabihang pag-abuso sa tawhanong katungod, giyera ug kabangis, ang simbahan ra kanunay ang kadangpan sa tawo.

Busa makahinumdom ko nga gitawag ang misyonaryong Redemptorist Fathers nga "redem-terrorist" nga hasta ang ilang kumbento diha sa Bajada gipaarakan og bala sa pagkusog sa Alsa-Masa sa syudad. Hangtod karon wa pa ang redemtoristang pari nga si Fr. Romero nga gisaknit didto sa Cebu.

Nakahinumdom ko sa sulti sa usa ka iladong Obispo ug kritiko sa kagamhanan sa El Salvador nga "When I feed the hungry, they [government] call me saint. But when I asked why the people are poor, they call me a communist."

Sa pagkatinuod, bug-at ang obligasyon sa mga Layko nga GSL kay sila kadtong dat-ugan sa mga problema sa ilang komunidad nga sama sa gamay nga barangay. Ang nakalahi lang kay boluntaryo silang tanan.

Matag tuig i-renew ang ilang katungdanan pinaagi sa usa ka seremonyas nga "installation" o "sending forth" sama sa nahitabo sa GSL sa St. Mary's Parish sa Buhangin niadtong Dominggo, atol sa kasaulogan sa "Solemnity of the Epiphany of the Lord" o gitawag kaniadto nga "Three Kings" isip timaan nga hapit na mahuman ang panahon sa Pasko.

Dili basta basta ang mga GSL kay gihatagan sila og katungdanan human sab sa daghang seminars ug pagtuon nga ilang naagian mga mora sab ug nisulod sila sa seminaryo o mikuha og kurso sa teyolohiya.

Dili sila matawag nga mga alagad ni Kristo kung wala kanila ang mga hiyas nga gikinahanglan sama sa pagkamaalampuon, pagkamadasigon ug pagkamahigugmaon sa Diyos ug sa katawhan. Good luck ninyong tanan!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph