MAGSAYSAY, Davao del Sur -- Luyo sa kasakit nga nahiagoman niadtong 2019, malaumon gihapon ang liboan ka mga biktima sa linog nga makabangon karong 2020.
Bisan ang uban, wa makaandam og Noche Buena ug Media Noche niadtong Pasko ug Bag-ong Tuig, mapasalamaton gihapon sila nga gihatagan og maayong panglawas human nasinati ang sagunsong linog niadtong Oktubre ug Disyembre.
Sumala ni Ramil Lumen, 42, kinahanglan na niyang mougmad sa iyang basakan aron adunay makaon ang pamilya nga nagpabilin pa sa evacuation center.
Sa pikas bahin, plano sa lokal nga gobyerno nga makapalit og 13 ka relocations sites nga mokabat sa 33.2 ektaryas karong tuiga diin adunay total budget nga P25.14 milyones.
Samtang matud ni Joseph Penonia, Municipal Disaster Risk Reduction Office (MDRRMO) action officer, nga ang National Housing Authority (NHA) nagsugod na pagtukod og 71 prefabricated houses didto sa Barangay Malawanit.
Sumala ni Penonia nga ang 2.8 ektaryang yuta nga pahimutangan niini gihatag sa party list Dumper Philippines Taxi Drivers Association (PTDA) pinaagi ni Representative Claudine Diana Bautista.
Karong bulana, gilaraw sa lokal nga gobyerno nga makapalit na sab og 2 ektaryang relocation site sa Barangay San Miguel aron tukuran og 63 ka mga balay nga ihatag sa Rotary Club.
Pipila ka mga sitios ug barangay ang di na papuy-an sa lokal nga gobyerno partikular sa Sitio Labidangan, Kabuhuan ug Belen sa Barangay Upper Bala; Sitio Albatana, Limonso ug Asbang Basag sa Barangay Maibo; Purok 1 ngadto 8 sa Barangay Tagaytay; Sitio Turan ug Asinan sa Barangay Balnate; Sitio Macabulos sa Barangay San Miguel; Purok 10, Datal Kolon ug Datal Lanao sa Barangay Bacungan; Purok 6, Sitio Blasan ug Upper Blasan sa Barangay Malawanit 4.
Gitataw ni Penonia nga adunay 2,002 ka pamilya gikan sa mga inhabitable areas ang ibalhin sa nagkadaiyang relocation sites.
Samtang niabli na ang ubang mga establisemento sa town center, gawas sa usa ka gasolinahan nga nahugno sa pagtay-og sa 6.9 magnitude nga linog, Disyembre 15, 2019.
Sumala sa tag-iya og bakery nga si Donald, buot nilang makabawi gikan sa trahedya apan taas nga panahon pa ang paabuton aron hingpit nga mahibalik sa normal ang ilang kinabuhi.
Samtang si Magsaysay Mayor Arthur Davin miangkon nga dakong hagit kanila ang pagsugod sa Bag-ong Tuig aron mahatagan og tabang ang tanang biktima sa linog ilabi na ang mga nawad-an og panimalay sa kabukiran ug sa Poblacion.
Nagsugod na sab ang lokal nga gobyerno pagtukod sa ilang mga opisina human di na magamit ang ilang building sa munisipyo dihang natiwas kahugmak ang mga bunbong ug kisame sa sud niini. (Orlando B. Dinoy)