PATAY ang usa ka miyembro sa Citizen Armed Forces Geographical Unit (Cafgu) human giayo'g kulata sa usa ka lalaki ug laing menor de edad alas 6 sa gabii niadtong Sabado, Enero 4, 2020, didto sa Barangay Lamanan, Calinan District, Davao City.
Ang biktima mao si Jason Endrina Tulabing, 26 anyos, miyembro sa Cafgu ubos sa superbisyon sa 89th Infantry Battalion sa 10th Division sa Philippine Army ug residente sa Purok 3-A, Sitio Darila, Barangay Lamanan.
Giingon nga lango sa ilimnong makahubog ang biktima kinsa mihangyo ngadto sa suspek nga sila Mirelle Gordo Roquez, 19, ug sa menor nga si alyas Johnny, 15, nga magpahatud sa sa Purok 3-A.
Sa imbestigasyon, migula nga giayo og bunal og bato ang ulo sa biktima nga miresulta sa iyang kamatayon.
Human sa hitabo, misibat ang mga suspek apan nasikop gilayon sa miresponde nga mga barangay tanod.
Sumala sa Calinan Police Station, ang 15 anyos usa ka Children in Conflict with the Law (CICL) kinsa dunay nahimong salaud apan gipaubos kini sa kadumalaan sa City Social Services and Development Office (CSSDO).
Ang lawas sa biktima gilayong gidala sa Anghel Funeral Parlor sa Calinan ning dakbayan samtang giandam na ang kaso nga ipasaka batok sa suspek nga hamtong.