Super Bilib: COO, presidente, lineman kaniadto

WA MAGDAHOM: Si Engr. Raul Lucero, kinsa nagsugod isip yano nga kawani sa kompaniya sa Aboitiz Power, wa magdahom nga paglabay sa dul-an tulo ka mga dekada, itudlo siyang presidente ug chief operating officer (COO) sa Visayan Electric kay yano ra siyang kawani kaniadto. (Tampo)
WA MAGDAHOM: Si Engr. Raul Lucero, kinsa nagsugod isip yano nga kawani sa kompaniya sa Aboitiz Power, wa magdahom nga paglabay sa dul-an tulo ka mga dekada, itudlo siyang presidente ug chief operating officer (COO) sa Visayan Electric kay yano ra siyang kawani kaniadto. (Tampo)

“WALA kay uyab. Wala koy uyab ato. Wa jud ko na-distracted ato.”

Mao ni ang butyag sa bag-ong gitudlo nga presidente ug chief operating officer (CCO) sa Visayan Electric, Engineer Raul Lucero, 51, kon nganong iyang “nadungan” pagkuha ang duha ka mga kurso ug nigraduwar niini sa samang tuig.

Iya usab nga gikuha ang board exams sa samang buwan ug tuig sa managlahing mga kurso, usa ini nakuha niya ang eight top spot.

Gawas niini, ang iyang training sa high school ug seminaryo.

Human siya nigraduwar sa high school sa Don Bosco, nisulod si Lucero isip seminarista sa Don Bosco Seminary College sa Canlubang, Laguna diin nigugol siya og duha ka mga tuig.

Human sa duha ka mga tuig, iyang “na-discern” nga ang kinabuhi sa pagka pari di iyang calling, busa nipauli siya sa Cebu niadtong 1986 .

Matod niya nga sa iyang pag-enroll sa kursong Electrical Engineering sa University of San Jose Recoletos (USJ-R) niadtong 1986, iyang nakita nga “luag” ang iyang class schedules hinungdan nga nikuha usab siya og mga subject sa Electronics and Communication Engineering (ECE).

Busa, na-enroll man tuod siya sa electrical engineering, daghang subjects sa ECE ang nakuha.

Sa 1989, ni-apply siya sa pagka scholar sa Aboitiz Power.

Gidungan

Sa Marso 1990, nigraduwar siya sa kursong electrical engineering. Sa summer class, nipa-enroll siya sa ECE. Human makita sa unibersidad nga hapit tanang subjects sa ECE iya nang nakuha, nigraduwar siya sa Oktubre sa samang tuig.

Di pa ni igo. Sa samang buwan, iyang gidungan pagkuha ang board exams sa electrical engineering ug ECE. Nakuha niya ang eight top spot sa electrical engineering ug nipasar sa ECE.

Nagsugod sa ubos

Niadtong Nobiyembre 16, 1990, nagsugod siya og trabaho sa Davao Light sa Davao isip systems planning and development engineer.

Maanindot ang ngan sa posisyon, apan nitrabaho siya isip lineman kay manaud sila og mga poste. Tipik sa iyang training ug trabaho ang pagsaka sa poste.

“Ang advantage nako kay nakaagi ko og hard labor,” matod ni Lucero.

Nasuwayan ang iyang abilidad ug kahibawo sa pag-antos atol sa labor strike sa kompaniya niadtong Pebrero 1991.

Unsay iyang trabaho sulod sa upat ka buwan nga strike? Gikan sa alas 8 sa buntag ngadto sa alas 5 sa hapon, nagsilbe siyang messenger, kanang tighatod sa mga bill sa mga kustomer sa Davao Light.

Gikan sa alas 6 ngadto sa alas 11 sa gabii, si Lucero nagsilbeng emergency lineman. Siya ug ang supervisor nga nagsilbeng driver, maoy motubag sa mga emergency, kon dunay mga reklamo sa nangaputol nga linya.

“Magdala ko og hagdanan ug mokatkat sa poste kon dunay madaut nga linya,” asoy pa niya.

Sa alas 11 sa gabii, mobalik si Lucero sa hotel diin sila temporaryong nagbutang og buhatan aron modawat sa fax copies sa mga electric bill nga iyang i-deliver pagkasunod adlaw.

Ni-survive siya niini sulod sa upat ka mga buwan.

Una pa sa google

Pagbalik na nila sa ilang buhatan, usa na siya ka design inspector, diin maghimo siya og mga mapa sa ilang mga kustomer. Kay lisod ang magsige og himog og mapa unya ang photocopy machine gagmay pa ang masulod ug kinahanglan pa niyang sumpayon ang mga mapa nga takdo pinaagi sa tape, naghimo siya og computer program nga naa ang mapa.

Labing una kini sa Pilipinas niadtong higayuna, mga dekada pa una nagsugod ang Google map.

VECO

Sa 2003, siya ang nidumala sa operasyon sa Aboitiz Power sa Subic ug sa 2004, gipadala siya sa kompaniya aron pag-manage sa Visayan Electric Company (Veco) base usab sa iyang kasinatian.

Kay mag 30 na unta siya ka tuig sa pagserbisyo, nagplano na siyang mo-retire.

“Karong November 2020, mag 30 years na ko. Plano na unta nako mo-retire,” butyag ni Lucero.

Apan nausab ang iyang huna-huna tungod sa pagtudlo kaniya sa mga Aboitiz.

“Postpone ang retirement. Di una ko mo-retire”, matod sa presidente ug COO nga nagsugod isip lineman ug mensahero.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph