NAG-unang prayoridad ni Lapu-Lapu City Mayor Junard “Ahong” Chan niining 2020 nga sulbaron ang suliran sa trapiko ug baha sa dakbayan sa 2020.
Kini ang duha sa daghang proyekto ug programa nga giladlad sa mayor atol sa iyang labing unang pakigpulong uban ang mga kawani sa kagamhanan sa dakbayan atol sa flag raising ceremony kagahapon Enero 6 sa Lapu-Lapu City Hall.
Matod ni Chan nga nasayod siya sa nagkagrabeng suliran sa trapiko dakbayan busa plano niya nga mag-abli ug mga access ug alternate road sa mga strategic nga lugar sa dakbayan aron maluagan ang dagan sa trapiko sa mga dapit diin sagad maghuot ang mga motorista.
Usa sa nakita sa mayor mao ang Brgy Basak nga maoy usa sa lugar sa dakbayan nga masinati ang grabeng trapik.
Karong tuiga makapaabot ang mga Oponganon ug acess road sa Sitio Sudtonggan lahos na sa Tipolo ug laing access road sa Pakpakan lahos sa Collinwood subdvision aron makibhangan ang trapiko sa main road sa Brgy Basak. Gawas sa naasoyng lugar laing access road nga motipas sa Brgy Subabasbas paingon sa Plantation Bay ang paga ablihan usab.
Lain sab sa Baranga Mactan paingon sa Brgy Maribago.
Kining maong mga dan sa nahisgotang mga lugar dako na ug matabang sa huot nga dagan sa trapiko sa dakabyan.
Gawas sa suliran sa trapiko gipasalig usab sa mayor nga tagaan ug solusyon ang suliran sa baha sa dakbayan.
Nasayran nga pipila ka mga dapit sa dakbayan ang daling masanapan sa tubig kun ugaling mobunok ang kusog nga uwan sanglit kuwang o wala gayud drainage system nga gipatuman sa mga dan sa dakbayan.
Gihimong basehanan sa mayor ang dan sa likod nga bahin sa city hall nga dali ra kaayong mobaha panahon sa ting-uwan. Ang naasoyng dapit pabuhatan ug drainage sa mayor hangtod na sa Manduae-Mactan Bridge.
Gawas niini una nang gitrabaho usab sa miaging tuig ang drainage sa Datag, Maribago nga laing dapit sa dakbayan nga bahaonon usab.
Ang ubang dalan nga bahaonon una nang gisanong ni Chan sa Department of Public Works and Highways DPWH.
Ang naasoyng mga plano sa mayor pipila lang sa daghan niyang plano nga iyang gipabuhagay sa mga kawani sa city hall. Kini naglakip usab sa pagpatukod ug socialized housing sa mga nanimuyo sa kdagatan, pagdugang sa allowance sa Brgy Health Workers BHW, Lupon ug boardof ditectors sa mga senior citizens, pagpalit ug dugang garbage truck, paghimo ug pampublikong sam-ang sa isla sa Olango ug pagpalambo sa isla ngadto sa usa ka Eco-Tourism hub.
“Always remember that we are one as family, we are one team, and we are one Lapu-Lapu, padayon ang atong pagtinabangay ug panaghiusa para sa kaayohan ug kalamboan sa atong dakbayan” matod ni Chan. (GCM)