SA WA pa nigawas ang balita kabahin sa alegasyon batok kang Land Transportation Office (LTO) 7 Regional Director Victor Caindec nga daw kalit nga pagdaghan sa iyang katigayunan, aduna nay reklamo nga nadawat ang iyang ulohang buhatan gikan sa National Intelligence Coordinating Agency (Nica) niadtong 2019, sa susamang pasangil.
Si Caindec nihimakak sa mga alegasyon nga gilabay kaniya sa iyang amahan nga si Victorio “Sonny” Caindec.
Ang reklamo nagpasangil nga nakabaton si Caindec og nakadaiyang sakyanan human siya milingkod isip regional director sa LTO.
“Since the time that undersigned assumed his office on January 23, 2018 as Regional Director of LTO VII, there has been a steady stream of anonymous complaints accusing the undersigned of schemes, acts of corruptionss and anomalous transactions,” tipik sa affidavit ni Caindec isip tubag sa reklamo nga nadawat sa buhatan ni LTO Assistant Secretary Edgar Galvante.
Ang affidavit gisumiter ni Caindec sa buhatan ni Galvante niadtong Nobiyembre 13, 2019.
Sa iyang affidavit, si Caindec nibutyag nga sa wa pa siya nisulod sa iyang kasamtangan nga posisyon, anaa na sa P8.35 milyones ang iyang net worth.
Gisaysay usab niya ang iyang mga negusyo sama sa car wash, detailing and sanitation service nga gi-manage sa iyang kinamaguwangan nga anak.
Nigawas sa kolum ni Bobby Nalzaro sa Enero 6, 2020 nga isyu sa SunStar Cebu ang kabahin sa alegasyon batok ni Caindec.
“The conflict simmered until it was time to boil. Sonny Caindec then went to Nica to report my “lifestyle” to which Nica sent the report to LTO Central Office to Asec. Edgar Galvante. I already sent my reply. Duly notarized, stamped and received. My SALNs are in order. Sure ko Mr. Nalzaro, dili ko pobre sa wala pa ko nisulod sa LTO,” ang labing uwahi nga pamahayag ni Caindec, pinaagi sa iyang Facebook post tubag kang Nalzaro.
Gawas sa mga alegasyon sa bag-ong mga sakyanan ni Caindec, gikwestiyon usab ang daw pagpabalhin sa direktor sa iyang anak sa mas mahalon nga tunghaan dihang nilingkod siya sa posisyon.
“School records of the undersigned’s children, attached for perusal, will reveal that the undersigned’s children have been enrolled in their respective educational institutions ever prior to assuming public office,” tipik sa affidavit ni Caindec.
Dihang nangayo ning buhatan sa kopya sa SALN ni Caindec, nagdumili pa siya og hatag tungod kay posible siya mopasaka og kaso batok kang Nalzaro.
“My lawyers advised me to not make it easy for Bobby in view of a legal strategy we will be undertaking.”