USA ka bag-ong natawo nga bata nga gibutang sa kahon napalgan gawas sa usa ka balay nga nahimutang duol sa sapa sa Barangay Mantuyong, Dakbayan sa Mandaue, niadtong Dominggo sa kadlawon, Enero 5.
Matod ni Police Major Ramil Morpos, hepe sa Mandaue City Police Office, nga nakadawat sila og tawag nga usa ka masuso ang giabandona sa inahan niini.
Dugang ni Morpos nga menor de edad ang nakakita sa masuso gawas sa pultahan sa balay ni Rene Boy Mendoza.
Ang balay duol sa sapa.
Nakaplagan ang babayeng masuso gumikan sa paghilak niini. Matod sa laing residente nga si Rolando Labiste nga anaa siya sa ilang sari-sari store dihang nakaplagan ang masuso.
Giadto ni Labiste ang lugar ug iyang nakita ang masuso nga naghilak. Nausab na ang kolor niini hinungdan nga dali niyang gidala sa Mandaue City Hospital.
Sigon ni Morpos nga maayo ra ang kahimtang sa masuso.
I-turnover kini sa mga sakop sa tambalanan ngadto sa Department of Social Welfare and Development (DSWD).
Miadto sab si Labiste sa City Social Welfare and Services aron ipadayag nga buot niini i-adopt ang bata.
Hinuon, tagaan pa og tulo ngadto sa unom ka buwan ang mga biological parents sa masuso aron kuhaon ang ilang anak. Kon mapakyas kini, mamahimo nang i-adopt ang bata. (NDT)