NAKAPALAK ang hosts Los Angeles Lakers sa Detriot Pistons sulod sa 20 ka mga higayon nga nagtultol kanila’g agianan paingon sa 106-99 nga kadaugan kagahapon sa National Basketball Association (NBA).
Gipangulohan ni Anthony Davis ang depensa ug opensa sa Lakers pinaagi sa iyang walo ka blocked shots, 11 ka rebounds ug 24 ka mga puntos.
Gawas kang Davis, nakarehistro sab og blocked shots alang sa Lakers sila si JaVale McGee (6), Dwight Howard (5) ug Avery Bradley (1). Ang 20 ka tapal o blocked shots sa Lakers mao ang labing daghan nga nahimo sa usa ka team gikan niadtong Marso, 2001.
“We were just protecting the paint,” matod ni Davis. “Last game (against New Orleans), we gave up 60-something points in the paint. It’s something we don’t like doing, and we tried to make an emphasis tonight on protecting the paint.”
Wala man tuod siya nakarehistro og blocked shots apan nihimo sab og langas si four-time MVP LeBron James alang sa Lakers pinaagi sa pagmugna og triple-double nga 21 puntos, 14 rebounds ug 11 assists.
Kini maoy ikasiyam nga triple-double ni James ning maong season ug ika-90 sa kinatibuk-an. Ang Lakers ningposte sa ikalima nilang sunodsunod nga kadaugan nga nagsaka sa ilang rekord ngadto sa 29-7 samtang ang Pistons natagak sa 13-24 nga baraha.
Si Howard kaduha nakapalak sa usa sa mga pambato sa Pistons nga siu Andre Drummond sa 4th quarter nga maoy nakapaugyaw sa mga sumosunod sa Lakers.
“I was just in the moment, trying to get the crowd going,” asoy ni Howard, kinsa niamot sab og 11 ka puntos ug siyam ka rebounds. “Detroit had hit some big shots, and we needed a lift. AD, he inspired me to want to go out there and try to get as many as I can.”
Ang Pistons gipangulohan ni Derrick Rose pinaagi sa iyang 28 puntos samtang niamot og 14 puntos ang kanhi Laker nga si Svi Mykhailiuk.
“Everything has got to go right to beat the top team in the league,” matod ni Pistons coach Dwane Casey.
“We played well, but we made just enough mistakes.”
Sa laing duwa, nagpakatap og 34 puntos si Montrezl Harrell samtang niamot og 32 puntos matag usa sila si Paul George ug Lou Williams aron agakon ang hosts Los Angeles Clippers ngadto sa kadaugan batok sa New York Knicks, 135-132.
Mao kini ang labing higayon nga adunay’y tulo ka mga magduduwa ang Clippers nga nakahimo og 30 puntos o labaw pa.
Sa laing mga duwa, ningdaog ang Miami Heat batok Portland Trail Blazers, 122-111, Minnsota Timberwolves batok Ceveland Cavaliers, 118-97, ug Memphies Grizzlies batok Phoenix Suns, 121-114. (AP, ESL)