Mga batan-on Gilas gamiton sa Fiba Asia Cup qualifiers

MOGAMIT og batan-ong mga magduduwa ang Gilas Pilpinas alang sa kampanya niini sa first round sa FIBA Asia Cup qualifiers nga ipahigayon sa sunod buwan.

Gipabuhagay kini ni Samahang Basketbol ng Pilipinas (SBP) president Al Panlilio bisan wala pa nakapili ang organisasyon og bag-ong headcoach alang sa Gilas Pilipinas.

“For February, it’s gonna be for hybrid for players, and maybe an interim coach among the coaches we have today here,” matod ni Panlilio sa interbyu sa Spin.ph.

Nagkanayon si Panlilio nga ang lima ka mga magduduwa nga napili sa special rookie draft sa Philippine Basketball Association (PBA) niadtong Disyembre sa miaging tuig mao ang molangkob sa kinauyokang puwersa sa team.

Gipangtumbok mao sila si Isaac Go, Matt Nieto, Mike Nieto, Allyn Bulanadi ug ang produkto sa UV Green Lancers nga si Rey Suerte.

Makig-uban kanila sila si Thirdy Ravena ug JD Tungcab, nga bag-uhay lang giapil sa Gilas Pilipinas pool.

Posible sab nga idugang sa team ang amateur standout nga si Kobe Paras.

Ang SBP mokuha og mga magduduwa sa PBA aron mokompleto sa team.

Dili pa lang dugay, ang SBP nipadayag nang daan nga dili na nila kuhaon si Andray Blatche isip naturalized player.

Plano sa SBP nga ihulip kang Blatche mao si Stanley Pringle sa Brgy. Ginebra Gin Kings o Christian Standhardinger sa NorthPort Batang Pier.

Kabahin sa coach, nagkanayon si Panlilio nga wala pa sila nakadesisyon kon kinsa ang kuhaon.

“We also have a meeting with the PBA next week. Hopefully by that time, we can advise them in more detail ‘yung plano namin,” batbat ni Panlilio.

Ang Gilas Pilipinas nahisakop sa grupo kauban ang Indonesia, Thailand, ug South Korea alang sa first round sa qualifiers. Ikasangka sa Gilas Pilipinas karong Pebrero ang Thailand ug Indonesia.

Giangkon ni Panlilio nga puwede unta nilang gamiton ang puwersa sa Gilas nga nakadaog og gold medal sa miaging Southeast Asian Games apan nakadesisyon sila nga mosubay og laing direksyon alang sa ugma damlag sa team. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph