NIBALIK na sa normal nga iskedyul ang rotating brownout sa probinsya sa Davao del Sur.
Gitataw sa Davao del Sur Electric Cooperative (Dasureco) nga mas nameligro karon ang sitwasyon mao nga labaw nga gidugangan pa ang gitas-on sa oras nga pawngon ang kuryente.
Niadtong Lunes, usa si Christina Olaguer, molupyo sa Bansalan, Davao del Sur, nga nagbagolbol sanglit bag-uhay pa lang nibalik ang kuryente apan subli kining nawala.
"Mga alas 10 brown-out na unya nisiga pagka-alas 2, human napawong na sab mga alas 3 hangtod alas 5 pasado. Unsa man na ilang style pangguba man na sa mga appliances," sumala niya.
Gitataw ni Engr. Edcil Lureca, opisyal sa engineering department sa Dasureco, nga 450 megawatts (MW) ang suplay sa kuryente sa Mindanao Grid ug 23 MW lang ang ilang nagamit.
"Pag weekend man gud, gamay lang ang nagagamit og kuryente kay wala man gud mga opisina," niya pa.
Gipahayag sa Dasureco nga gipahamtang na pag-usab ang rotating brown-out nga tag lima ka oras dinhi sa probinsya.
Dason niya, mas nameligro karon ang sitwasyon dinhi sa Mindanao sanglit tulin ang pagkahubas sa tubig didto sa Lake Lanao, nga mao ang pinakadakong tinubdan sa kuryente dinhi sa isla.
Gumikan niini, gikabalak-an sab nga mag-shut down ang tanang planta sa Agus complex sanglit nikunhod ngadto sa 698.9 gikan sa normal nga 701 meters nga water level.
Gibarugan sa Dasureco nga nag-agad lamang ang ilang pagpawong sa kuryente subay sa mando sa National Power Corporation.
Nagkinahanglan og 1,447 MW ang Mindanao Grid samtang anaa lang sa 903 MW ang gihatag niini karon ug kuwang na karon og 544 MW aron mahatagan sa saktong enerhiya ang tibuok isla sa Mindanao. (Orlando B. Dinoy)