TINUOD ba kaha nga kining sayaw nga gitawag nga Sinulog gikan diay kuno sa Sulu? Mao kini ang usa sa mga teorya nga mahisgutan sa usa ka forum alas 2 sa hapon karong Enero 14, 2019 diha sa Palm Grass Hotel.
Atong nasayran nga kining forum gititulohan og “Retracing Sinulog: Aforum on the precolonial roots of the Sinulog dance.”
Matod pa dunay mga video footage nga gikuha didto sa Sulu ni Pros Laput sa Social Communications Asia. Uban sa maong forum mao ang mga eksperto nga sila si Professor Darwin Absari sa UP-Diliman Institute Islamic Studies ug Jobers Reynes Bersales sa University of San Carlos (USC).
Tinuod ba gyud kaha kini? Motambong ko sa maong forum aron maminaw mismo sa maong lecture.
Hinuon, kining Sinulog karaan man gyud kini nga sayaw-pangadye sa panahon nga wala pa moabot dinhi sa atua si Ferdinand Magellan.
Maka-imagine ko nga gisayaw kining Sinulog niadtong higayona nga gibunyagan si Rayna Juana, ang asawa ni Rajah Humabon nga maoy hari sa Sugbo.
Ang imahen ni Santo Niño o ang Balaang Bata nga si Hesus gidala ni Magellan uban sa imahen ni Mama Mary gihatag ni Magellan isip gasa alang kang Rayna Juana.
Sinulog karon
Nalipay ko nga nakakita nga nabuhi na ang Sinulog fair, kining mga stalls atubangan sa Cebu City Sports Center karong liwas na sa bag-ong tuig.
Sa miaging katuigan, mas sayo moabli ang Sinulog fair apan karon naulahi sila. Manghinaot lang ko nga dili kini moresulta og kagamay sa mga revenues.
Di lang sab ko sigurado nga ipadayon ba ang Sinulog fair diha sa Plaza Independencia.
Manghinaot lang gyud ko nga naplantsa ra ang mga gusot dihang gitukod ni Mayor Edgar Labella ang Sinulog Board. Lahi sab kini sa Sinulog Foundation Inc. nga gitukod kaniadto pang 1984 aron maoy modumala sa Sinulog.
Basta ang akong nasabtan man gud nga kining SFI natukod isip mekanismo aron maka-solicit kini nga dili na moagi sa Commission on Audit (COA).
Basin og nakakita na sila og paagi niini.
Gubat?
Alang kanako, mas maayong mangaliya kita nga malikayan ang gubat karon tali sa Iran ug Estados Unidos. Nitumaw ang maong posibilidad human gitirahan sa usa ka drone ang usa ka heneral na Iran didto mismo sa Iraq.
Sa akong nasabtan, gusto ang White House nga gipangulohan karon ni Presidente Donald Trump og gubat. Apan gisaway siya sa iyang oposisyon. (@anol_cebu sa Twitter)