GITUN-AN karon sa kagamhanang lokal sa siyudad sa Digos ang pagdeklara sa "state of calamity" nunot sa epekto sa nasinating El N¤o phenomenon sa probinsiya.

Gibutyag ni Vice Mayor Joseph Penas, nga nihimo na og lakang ang Sangguniang Panglungsod (SP) aron tun-an ang sitwasyon sa gisagubang nga hulaw ug krisis sa ekonomiya.

Ni Penas pa, mismong si Mayor Arsenio Latasa, ang nangulo sa pagpatawag og tigom sa iyang mga labaw sa departamento aron hisgutan ang suliran.

"Nag-meeting na ang committee sa konseho. Nagpatawag mi sa mga government agencies and Department of Agriculture kung unsay angay himuon unya inig mahuman na si Mayor, ayha pa mi mohatag og update," sumala niya.

Dason ni Penas, angay seryosohon sa matag usa ang suliran ilabi pa sa mga pulitiko, angay ihiklin una ang bisan unsang bikil sa pulitika aron hisgutan ang suliran.

"Bisan unsa atong partido ug gidangatan as elected official dapat tagdon sa ni before campaign period," dason niya.

Si Peñas, kinsa nagpapili pagka-mayor ubos sa Nationalist Peoples Coalition (NPC) ug gisuportahan ni Mayor Latasa nga mohulip sa iyang posisyon.

Gikaatbang niya karon sila si Councilor Josef Cagas ug Councilor Romualdo Crispino sa samang posisyon.

Ang bise mayor nga giingong gisugdan paglabay og lapok sa mga kaatbang sa pulitika nagbutyag nga padayon lamang siya sa iyang trabaho sanglit anaa sa katawhan ang paghukom sa nagkaduol nga bugnong lugaynon.

Bisan sa panawagan nga kausaban sa dakbayan naglaum gihapon si Peñas nga nakit-an sa katawhan ang dugay na nga kausaban sa siyudad gikan sa pagka-lungsod niini hangtod nga nahimugso isip dakbayan. (Orlando B. Dinoy)