USA ka lalaking nagsakay og biseklita ang nadala sa ospital human siya nabanggaan sa motorsiklo didto sa Kilometro 39, National Highway, Barangay Ising lungsod sa Carmen, Davao del Norte, Lunes sa buntag.

Ang biktima nailhan nga mao si Atelino Castro, 79, ug molupyo sa Purok 18, Barangay Ising sa samang lungsod.

Sa report gikan sa Carmen Municipal Police Station nasayran nga pasado alas 9:00 sa buntag sakay sa iyang biseklita ang biktima.

Sa dihang mitabok siya sa highway, aksidente kining nabanggaan sa usa ka motorsiklo nga gidrayban ni Dionesio Tecson.

Nabalintong ang biktima, nahiagum og mga pangos ug bun-og sa nagkadaiyang parte sa kalawasan.

Daling gidala sa ospital ang biktima aron mapatambalan.

Ang driver sa motor daling mitahan sa iyang kaugalingon ngadto sa mga otoridad.

Samtang sa laing bahin, usa ka babayeng sakay sa motor ang naospital sa dihang mibuto ang ligid sa iyang gisakyang motor didto sa lugar.

Ang biktima mao si Juliet Raiz, hamtung ang panuigon, ug molupyo sa Barangay San Isidro, lungsod sa Carmen.

Sumala sa report, nga pasado alas 5:00 sa hapon samtang sakay sa usa ka single motor ang biktima nga gidrayban ni Victor Raiz gikan sila sa Barangay San Isidro, padulong sa siyudad sa Panabo.

Pag-abot sa maong dapit, kalit nga mibuto ang ligid sa likod nga bahin sa nahisgutang motor hinungdan nga nawad-an og kontrol ang driver ug natumba sila.

Ang biktima nakahiagum og mga pangos, bun-og sa kalawasan human naligid sa sementadong dalan.

Daling gidala sa ospital ang biktima aron mapatambalan. (Marvin Pineda)