GRUPO sa Front Committee 53 sa New People's Army (NPA) ang gitudlo sa mga otoridad nga suspek sa bag-ohay nga pagpamomba sa probinsiya sa Cotabato.
Sa nahagpat nga taho gikan sa Tactical Command Post sa 6th Infantry (Kampilan) Philippine Army, nasayran nga alas 12:40 sa udto, Marso 15, nahitabo ang pagbusikad sa bomba.
Naatol kini sa pag-agi sa military truck sa 6th Infantry Battalion Philippine Army sa barangay New Bulatukan, Makilala.
Kalit nga nadungog ang makabungog nga pagbuto, swerte na lamang nga way naangol sa mga sundalo gawas lamang sa mga igo sa shrapnel sa maong sakyanan.
Dali nga miresponde ang mga ginsakpan sa Explosive Ordnance Disposal Battalion sa Philippine Army.
Nasuta sa otoridad nga landmine ang mibusikad kilid sa kalsada nga gitanom sa mga rebelde.
Nadakpan sab sa militar ang usa ka menor-de-edad nga lalake nga maoy nagbutang sa bomba.
Siya gitumbok nga sakop ni Kumander Jasmin, naglihok sa North Cotabato ug Davao Del Sur.
Gitahasan dayon ni 57th IB Commander Colonel Bernie Langub ang iyang mga ginsakpan nga magpatrolya sa Makilala-Bansalan Highway nga sagad target sa mga NPA nga tanuman og bomba.
Kahinumduman nga niadtong nakalabay nga bulan laing landmine sab ang nibuto sa barangay New Bulatukan diin tulo ka sakop sa Mechanized Infantry Battalion ang nasamdan.
Gitumbok ni Langub nga ang munisipyo sa Makilala usa sa mga lugar nga gilubluban sa mga NPA nga anaa nagkampo sa mga hilit nga dapit sa Mount Apo utlanan sa siyudad sa Davao, Cotabato, Kidapawan City ug Davao Del Sur. (Edgardo Fuerzas)