GRABE ang kahimtang sa usa ka laborer sulod tambalanan human siya gidunggab sa tricycle driver sa alas 8:30 sa gabii niadtong Lunes.
Ang biktima mao si Peter Paul Francisco, 31, ulitawo; samtang ang suspetsado mao si Ronald Villaren, 25, ulitawo, pulos nagpuyo sa # 20 Datu Bago, Barangay 5-A Bankerohan, siyudad sa Davao.
Base sa blotter sa San Pedro Police Station, ang biktima nakig-istorya lang sa iyang higala atubangan sa ilang balay apan kalit miabot ang suspetsado.
Sa paghiabot sa suspetsado sa nahimutangan sa biktima kalit miibot og kutsilyo sa iyang hawak dayon gidunggab sa walang bukton ug tiyan si Francisco.
Ang biktima daling gidala sa iyang kabanay didto sa Davao Medical Mission Hospital samtang ang suspetsado daling mibiya sa crime scene paingon ngadto sa wala masayri nga lugar.
Nasayran nga kanhi panagbikil sa duha ang hinungdan nganong gidunggab sa suspetsado ang biktima.
Sa pagsuwat ning balita, gipangita sa kapulisan ang suspetsado aron sikopon ug pasakaan og kaso ngadto sa korte.(AD)