TUNGOD sa problema sa network service provider, wala una mag-isyu ang Philippine Statistics Authority (PSA) 7 og mga dokumento nga makuha sa ilang CRS Serbilis Outlet sa Gaisano Capital Building, Colon St., Cebu City.
Gipahibawo sa tigpamaba sa PSA 7 nga si Noel Rafols nga nagsugod ang maong problema niadtong Lunes, Enero 6.
Tungod kay wala’y internet, dili una maka-isyu ang PSA 7 sa birth, marriage, death certificates ug certificate of no marriage.
Dugang ni Rafols nga dili pa sila makasulti kon kanus-a mabalik ang maong problema sa ilang internet provider. Hinuon gipasalig niini nga ilaha dayon ipahibawo sa publiko kon mobalik na og gana ang internet.
Sa pagkakaron mamahimong mogamit sa online system ang gusto mokuha sa mga authenticated nga mga dokumento o kaha motawag sa PSA Hotline, apan iyang gipasabot nga dili kini diha-diha nga makuha dayon.
Dugang ni Rafols nga sagad sa mokuha sa mga dokumento sa ilahang ahensiya kanang diha-diha dayon gamiton.
Laing option nga mamahimong magamit sa publiko hilabi na kadtong layo sa dakbayan sa Sugbo kaning Batch Requests Entry Systems (BREQS) sa nagkadaiyang Local Civil Registry Office (LCRO) sa mga dakbayan ug lungsod.
Gibutyag ni Rafols nga sa 53 ka mga munisipyo ug dakbayan sa lalawigan sa Sugbo, anaa na sa 49 ka mga local government units ang nipahimulos niini.
Mamahimo usab kining BREQS sa mga business centers sa SM Malls susama sa SM City Cebu, SM Seaside ug SM Consolacion.
Hinuon, aduna kini dugang bayad tungod kay ang LGU o ang service provider mao ang mokuha niini nga by batch sa PSA offices.
Mamahimong mosunod sa Facebook Page sa PSA 7 aron makakuha og latest update kon mabalik na ang ilang operasyon sa CRS Serbilis Outlet sa Gaisano Capital. (HBL)