KINSE ka mga gikatahapan nga snatchers ang gisikop sa mga pulis sa alas 2:00 sa kaadlawon kagahapon sulod sa lodging house nga ilang giabangan dinhi sa siyudad sa Davao.
Mga suspetsado giingon nga midayo dinhi sa siyudad gikan sa siyudad sa Tagum ug Compostela Valley province.
Sila naghangyo sa Superbalita nga taguon ang ilang bansagon sanglit dili sila mga snatchers apan nga peryante nga buot makasapi atol sa Araw ng Dabaw.
Mga suspetsado gitago sa Superbalita nga sila Kysl Lou, 20, nagpuyo sa Santos Cuyogan, Barangay Matina Crossing; Joven, 26; Benny, 26, Christopher, 28; Ronie, 28; Jeshua, 30; Marife, 29, pulos nagpuyo sa Visayan Village, siyudad sa Tagum; Romel, 28; Danilo, 22, nagpuyo sa Malinawon, Mawab, Compostela Valley province; Nonoy, 27, nagpuyo sa Purok Mangga, siyudad sa Tagum; Salem, 35; Sheena, 29; Rubelyn, 24, Ellyn, 26, pulos nagpuyo sa Adecor, Maco, Compostela Valley province; Richie, 17, nagpuyo sa Sto. Tomas, Davao del Norte.
Kasagaran kanila mag-agaw ug magtiayon kinsa nagbutyag sa Superbalita nga naalaan lang sila nga mga snatchers mao nga gisikop sila sa kapulisan.
"Mga peryante mi. Mianhi mi sa Davao kagahapon para makasapi pinaagi sa pagpadula sa mga Dabawenyo," suma sa mga babaye nga nahinabi kagahapon sulod sa selda sa San Pedro Police Station.
Mga suspetsado gisikop sa mga pulis nga gipangulohan ni Police Chief Inspector Caezar Cabuhat, hepe sa San Pedro Police Station, human dunay nagpahibalo kanila nga dunay mga snatcher nga nagsaka sa Family Lodge sa dalang San Pedro.
Sa pagsuwat ning balita, mga suspetsado atua pa sa ilang selda samtang nagpaabot nga mahuman ang imbestigasyon sa kapulisan.
Sila naghangyo nga pagawason na sa kapulisan sanglit wala silay sala nga nahimo dinhi sa siyudad. (AD)