PANAGHUGPONG ni kanhi PBA star Dondon Hontiveros ug sa kasamtang pointguard sa Talk N’ Text RR Pogoy maoy sentro sa atraksiyon sa dihang ipahigayon ang usa ka charity game tali sa Southwestern University-Phinma (SWU) Cobras, ug University of Cebu (UC) Webmasters karong Biyernes, Enero 10, 2020 sa Cebu Coliseum.
Matod ni Hontiveros, kinsa konsehal na karon sa dakbayan sa Sugbo, nga moduwa sila ni Pogoy ubos sa University of Cebu (UC) nga eskuwelahan nga ilang gigikanan sa wala pa sila mamahimong PBA player.
Ang kita sa maong charity game maoy ihatag nga ayuda ngadto sa mga nabiktima sa sunodsunod nga nga sunog nga miigo sa pipila ka mga barangay sa dakbayan sa Sugbo.
Kini mao ang barangay Inayawan, Duljo-Fatima, Mambaling ug T. Padilla. Ang maong kalihukan nga gitambayayungan sa Fighter Fifty Wine, mosugod sa alas 6 sa gabii.
Ang ticket mapalit sa ubos nga presyo diin P30 alang sa general admission, P60 sa upper box, P120 alang sa lower box, P150 sa ringside ug P200 alang sa VIP section ug sa stage seats.
Sa samang higayon, magsilbi usab kining preparasyon sa Cobras, ang bag-ong kampiyon sa Cebu Schools Athletic Foundation, Inc. (Cesafi), sa ilang pagsalmot unya sa Philippine Collegiate Champions League (PCCL) karong Pebrero.
Ang Webmasters, sa ilang bahin, makabaton na usab og balik sa serbisyo sa ilang kanhi coach nga si Kern Sesante kinsa maoy gihulip ni coach Raul “Yayoy” Alcoseba. Kon kahinumdoman, niadtong 2016 si Sesante gipulihan ni Alcoseba sa maong puwesto apan human sa tulo ka tuig, si Alcoseba na usab ang nahulipan ni Sesante.
Ang laing produto sa UC nga si multi-awardee June Mar Fajardo motan-aw usab sa maong panag-engkuwentro.
Gipaabot nga mangulo sa Cobras mao ang ilang import nga si Lamine Thiam ug ang most valuable player (MVP) awardee nga si Shaquille Imperial. (JBM,JNP)