TULO ang naangol human nagsungag ang motorsiklo kagahapon, mga alas 8:45 sa buntag sa Brgy Dayawan, lungsod sa Villanueva, Misamis Oriental.
Gikostudya sa kapolisan sa Villanueva Police Station ang duha ka mga motorsiklo nga nadaot ang hitsura gikan sa pagkabangga.
Giila ang biktima nga mao sila si Delmar Nalagon, 24, ulitawo, ug backrider niining si Robinson Velmen, 53, minyo pulos molupyo sa susamang dapit.
Kritikal ang kondisyon sa laing driver nga mao si Romel Arsite, 39, minyo, sa susamang lungsod.
Gipangdala ang mga biktima sa Northern Mindanao Medical Center (NMMC) ning siyudad sa Cagayan de Oro kinsa duha kanila ang anaa sa tlaandugon nga kahimtang.
Nasayran nga pauli na ang mga biktima dihang nagsungag ang motorsiklo, tungod sa kakusog sa ilang mga dagan nalagpot ang mga sakay.
Si Nalagon nakakapot hinungdan nga gamay lamang nga samad ang naangkon niini sa lawas apan ang backrider niini nalagpot ug maayong pagkabunal sa ulo sa semento.
Samtang ang laing driver nabunal pag-ayo ang ulo sa semento human naligid ang gimanehong motorsiklo.
Giresponde ang hitabo sa kapolisan sa Villanueva Police Station ug gipangdala ang mga biktima sa NMMC ning siyudad.
Sa pagsulat ning balita nagpabilin pa sulod sa balay tambalanan ang tulo ka mga biktima samtang padayon pa ang gihimong imbestigasyon sa kapolisan. (SVB)