MAKANGANHA ang nahimong resulta sa Public Pay Parking Zone sa Davao City gumikan usa ka semana pa lamang kini gipatuman, mikolekta na kini og sobra usa ka gatos ka pesos.
Gibutyag ni City Treasurer's Office officer-in-charge Lawrence Bantiding nga ang siyudad mikita na og P121,000 sa unang tulo ka adlaw pa lamang sa pagpatuman sa kamandoan sa average niini nga P40,000 matag adlaw.
Kahinumdoman nga sugod niadtong Enero 2, 2020, ang City Transport and Traffic Management Office ang mipatuman sa pagpangolekta og parking fees sa pipila ka dalan sa Davao City.
Mando kini sa City Transport and Traffic Management Office (CTTMO) nga gipahibalo Oktubre sa nakalabay nga tuig, diin ipatuman ang Public Pay Parking Zones sa mga dalan sa San Pedro, Ilustre, Pelayo, Iñigo, Villa Abrille, Monteverde ug Gov. Duterte.
Gibutyag ni CTTMO head Dionisio Abude nga ang parking zone subay sa City Ordinance 052-13, Series of 2013, nga "An Ordinance imposing Parking Fees on all vehicle owners/drivers for using certain streets in Davao City as Parking Spaces and for other purposes" nga giameyenda sa gikan sa City Ordinance 153-A, Series of 1990 nga Comprehensive Transport and Traffic Code of Davao City.
Ang may bayad nga parking magsugod alas sais sa buntag ngadto alas nwebe sa gabii, Lunes ngadto Sabado sa gihisgutang mga dapit.
Maayong tilimad-on kini kay gawas nga mihapsay ang mga kadalanan ning siyudad, naka-kuwarta sab ang panudlanan sa dakbayan.
Pero lagmit moubos kini, kay ang mga nahatagan og ticket nga nakabayad, dili naman sila magpataka og parking sa mga lugar nga naigo sa Public Pay Parking Zone, -- resulta mahapsay na gyud ang dagan sa trapiko.
Kudos sa mga kugihan nga kolektor, gumikan gawas ilang kakugi sa pagpunay og bahis-bahis sa mga lugar nga naigo sa pagpatuman, lig-on sab ilang mga tubag ug dunay lig-on nga pasensya sa mga tawo nga mopagula sa ilang opinyon labot niini nga ordinansa.