DUHA ka mga patayng lawas ang nakaplagan kagahapon sa buntag sa managlahing dapit ning siyudad sa Cagayan de Oro.

Unang biktima mao ang usa ka babaye nga gidagsa daplin sa dagat saZone-4, Sarat, Brgy. Agusan ning siyudad.

Matud ni Senior Police Officer 1 Ronillo Ubas sa Police Station 6 (PS6) sa Puerto nibutyag sa Sun.Star Superbalita nga walay nakaila sa maong babaye nga gibana-banang nagpangidaron og 50 anyos ug walay saktong puloy-anan.

Matud ni Ubas nga adunay deperensya sa pangutok ang biktima gani magsige kini og lakaw lakaw sa Puerto nga bahin ug mamunit og basura aron kan-on.

Adunay higayon nga gikostudya sa kapolisan ang biktima kay nagkagidlay hinungdan nga giilisan ug gipakaon apan nilakaw ra usab ug wala nakita.

Kagahapon mga alas 4:30 sa kadlawon nakaplgan sa mga residente daplin sa baybayon nga adunay nadagsa nga patayng lawas ug walay sapot ang ibabaw nga bahin niini.

Sa gihimong inisyal nga imbestigasyon sa kapolisan walay nakitang foulplay sa kamatayon sa biktima tungod kay walay mga samad nga naangkon niini. Daghan ang nagtuong nalumos lamang ang biktima.

Sa pagsulat ning balita gidala na ang patayng lawas sa Bollozos funeral parlor ug gipanawagan sa kapolisan ang mga hingtungdan niini nga e claim ang patayng lawas.

Samtang laing 50 anyos ang nakaplagan nga wala nay kinabuhi kagahapon mga alas 6:00 sa buntag sa Greenhills, Bulua ning siyudad.

Giila ang biktima nga mao si Alvino Laguit, 50, minyo, lumad nga taga lungsod sa Alubijid, Misamis Oriental, nagtrabaho isip sekyu sa maong dapit.

Nasayran nga nagbuy-od ang patayng lawas ubos sa trisikad nga gimaneho niining puno sa mga container nga adunay sulod tubig.

Gibutyag sa asawa sa biktima nga adunay sakit sa higblood ang iyang bana hinungdan nga dako ang pagtuo niining giatake sa sakit ug wala nabantayan dihang nangayo og tabang.

Wala sab nakita ang sakop sa Scene of Crimes Operartives nga foluplay sa kamatayon sa biktima. (Stephanie V. Berganio)