DAVAO DEL NORTE - Duha ka mga patay nga lawas ang napalgan niadtong milabay nga adlaw didto sa Liwayway Village, National Highway, Magugpo East, siyudad sa Tagum.
Usa sa mga biktima giilang si Jovan Manu-og, 19, molupyo sa San Roque, Maco, Compostela Valley Province samtang ang usa wala pa maila ang bansagon.
Sa natala nga report sa Tagum City Police Station, nakaplagan ang mga patay nga lawas alas tres sa kaadlawon sa usa ka Edwin Ayuban sa dihang mo-duty na unta sa usa ka internet cafe isip kahero.
Sumala nga daling gipahibawo ni Ayuban ang kapulisan sa nakitang nagbuy-od nga mga patay nga lawas nga naligo sa kaugalingong dugo.
Sa inisyal nga imbestigasyon sa kapulisan, parehong dunay igo pinusilan ang mga biktima sa ilang ulo.
Nakuha sa mga sakop sa Scene of the Crime Operatives ang duha ka fired cartridge ug usa ka basiyo sa bala sa armas sa nahitaboan.
Mga patay nga lawas sa biktima gihatud na sa Rubio Funeral Homes samtang padayon pa ang imbestigasyon nga gipahigayon sa kapulisan. (Domilyn Pico)