‘Pusher’, 68, mibalhin sa Kananga, nabuko, nadakpan

KANANGA, Leyte – Usa ka senior citizen nasikop sa kapulisan sa anti-illegal drug operation, sa Sityo Piling Barangay Libongao, Sabado, Enero 4, 2020.

Giila ang suspek nga si Rolando Borgueta, 68, way trabaho, taga Barangay Sagkahan, Carigara, Leyte.

Nakuha gikan kang Borgutea ang usa ka gamay nga pakete sa gituhoang shabu nga napalit sa usa ka poseur buyer.

Sa pagkapkap, ilang nakuha gikan sa usa ka pouch ang laing tulo ka pakete sa gituhoang shabu ug P500 nga marked money.

Matod ni Police Major Ariel Salarda, hepe sa Kananga Police Station, naa sa watchlist sa Carigara Police si Borgueta.

Dugang ni Salarda nga dunay kabanay si Borgueta nga nasikop sa Carigara.

Mao kini ang nitug-an sa kapulisan sa iyang mga kauban.

“Bag-o lang ni siya diri sa Kananga kay init na man ni ngadto sa Carigara, murag nagpalamig diri,” matod ni Salarda.

Gipanid-an sa mga silingan si Borgueta ug dunay niingon nga kwartahan kay dunay uban silingan nga nakahuwam og kwarta.

Ang suspek nag-abang og balay sa tag P1,500 matag buwan ug dunay giutang nga motorsiklo nga P2,000 ang buwan.

Nakadawat ang kapulisan sa maong report ug ila kining gipanid-an. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph