ORMOC City, Leyte – Kanhi mayor sa lungsod sa Babatngon nitahan sa kapulisan, Lunes, Enero 6, 2020.
Si kanhi mayor Charita Chan nalutsan og warrant of arrest sa kalapasan sa Section 3 (e) sa Republic Act 3019 o Anti-Graft and Corrupt Practices Act.
Ang warrant of arrest giluwatan ni Sandiganbayan, Third Division, Presiding Justice Amparo Cabotaje-Tang.
Si Chan gipasakaan og kaso gumikan sa pag isyu og cockfighting permit sa usa ka Nicomedes Alde.
Ang Sangguniang Bayan sa Babatngon dunay gipasar nga resolusyon nga nagdili pag-isyu og permit kang Alde gumikan sa wa pagtuman sa mga rekisitos sa ilang cockfighting ordinance.
Bisan niini, niisyu gihapon og permit to operate si Chan nga way pagtugot sa konseho hinungdan nga gipasakaan og kaso.
Matod ni Police Lieutenant Colonel Bernard Lao, assistant regional chief sa CIDG-8, sa paggawas sa warrant of arrest, giserbi kini sa mga sakop sa Criminal investigation and Detection Group – Northern Leyte sa balay ni Chan, apan wa ang kanhi mayor.
Sa miaging adlaw, ni-surrender si Chan sa opisina sa CIDG sa Ormoc City ug nipiyansa og P90,000.
Nigawas ang release order ni Judge Gerlie Borrel-Yu, executive judge sa Ormoc City Regional Trial Court.