PULIS nga sakop sa Maribojoc Police Station sa lalawigan sa Bohol patay sa ambush sa wa pa mailhing mga killer alas 8 Lunes sa gabii, Enero 6, 2020.
Naangol usab ang iyang asawa nga naa na sa usa ka pribadong tambalanan sa Siyudad sa Tagbilaran.
Ang biktima giila nga si Police Corporal Arnel Bayot, taga Barangay Tinangnan, lungsod sa Tubigon, Bohol.
Sakay sila si Bayot ug iyang asawa sa ilang Toyota Corolla sedan padung mopauli sa Tubigon.
Apan pag-abot sa national highway sa Barangay Guiwanon, lungsod sa Maribojoc, gipaarakan sila sa killers sa armalite rifle.
Patay diha diha dayon si Bayot tungod sa kadaghang mga samad sa lawas niini samtang ang asawa nakaangkon lang og samad sa paa ug bukton.
Nakakuhag og 19 ka mga basiyo sa bala sa M16 rifle ang mga imbestigador sa Maribojoc police station nga ipasusi pa nila sa PNP Crime Laboratory.
Matod ni Police Colonel Jonathan Cabal, provincial director sa Bohol Provincial Police Office, nga ila pang subayon ang motibo sa krimen sanglit niadong 2003, ang iyang amahan nga usa usab ka pulis gibanhigan patay usab sa Tubigon.
“Yung mag-ama, pareho ang fate nila. SPO3 ang tatay nya. I-check namin ano ang possible character ng family. Baka may nakaalitan. I check mga ibang anggulo that will give us leads para makuha natin ang mga perpetrators,” sigun ni Cabal.
Si Bayot gipaubos sa moral recovery program sa Philippine National Police (PNP), apan matod ni Cabal nga wa pa siya masayod unsay kaso nga gikalambigitan niini.
Kanhi nadestino sa San Francisco Police Station sa mga Isla sa Camotes, probinsya sa Sugbo si Bayot, apan nabalhin sa lalawigan sa Bohol.
“Mag ba-background check ako sa CPPO. Baka may nakaaway siya doon or as an operative may nasagasaan na malalaking tao,” dugang ni Cabal.
Giangkon ni Cabal nga naglisud sila sa pag-ila sa mga killer tungod kay way nakasaksi sa insidente.
Human sa pag-ambush, dali siya nga mipalusad sa dragnet operation sa tanang police stations, apan pakyas sila sa pagdakop sa mga criminal.
Adunay nakuha nga impormasyon si Cabal, apan matod niya nga kinahanglan pa kini nga ipaubos sa makuti nga imbestigasyon.
Gihinabi na usab niya ang asawa sa biktima nga si Richelle alang sa pagkuhag mga impormasyon nga makatabang sa mbestigasyon. Ipasusi usab ang cellular phone aron masuta kon aduna bay hulga nga nadawat si Bayot.