GITUDLO ni Mayor Edgardo Labella isip bag-ong officer in-charge (OIC) si Atty. John Jigo Dacua sa Department of Public Services (DPS) sugod Martes, Enero 7.
Si Dacua ang nihulip kang Engr. Joel Biton kinsa gibalik ni Labella sa iyang karaang pwesto nga mangulo sa Street Lighting division.
Ikauban ni Dacua, kanhi pangulo sa Cebu City Environment and Natural Resources Office (CCENRO), nga magsilbing iyang assistant si Irvin Cabales, ang iyang kanhi partner sa environment office.
Samtang si Assistant City Administrator Atty. Junine Aragones ang mohulip kang Dacua sa CCENRO ug maoy mangulo aron makab-ot ang proyekto ni Labella nga mao ang pagtanom og tres milyones ka semilya sa kahoy sulod sa tulo ka tuig.
“Engr. Joel Biton has done a good job but I still need to improve it, a better approach, scheme and operation so I am assigning Atty. John Jigo Dacua as OIC chief of DPS,” padayag ni Labella.
“I’ve been observing and going around in the City and it can’t be denied that there are certain areas in the City nga limpyo na kaayo, thanks to Engr. Biton but I wanted more, more and more,” dugang sa mayor.
Ang amahan sa dakbayan sa Sugbo gusto nga paspas ug dali ang pagkolekta sa basura gikan sa kabalayan gumikan sa presensiya sa 21 ka mga garbage compactor truck nga sukwahi sa iyang naobserbahan.
“It’s the delay. When I go around early in the around, I just do not pass the areas where they are picking the garbage. I’m looking at how and how long they pick up the garbage. That is one thing Atty. Dacua should look into,” ni Labella pa.
Sa panagpares ni Dacua ug Cabales, gusto ni Labella nga mopaspas na ang koleksyon ug mawagtang na ang sistema sa mga garbage loader nga ilain ang mga basura nga mapuslan pa aron mapatimbang sanglit mao kini ang nakamugna og kalangan. (PAC)