ISIP pagsumbalik sa kaayo ug supporta nga gihatag sa kagamhanan sa dakbayan sa Sugbo niadtong Pasigarbo sa Sugbo sa Agusto 2019, gipahibawo ni Gobernador Gwendolyn Garcia nga mohatag usab og gahin ang Probinsya nga ikaayuda sa siyudad alang sa kalihukan sa Sinulog.
Matod ni Garcia nga sanglit dili man makahatag og luna nga pahigayonan sa kalihukan, pinansyal nga suporta ang ilang idunol ngadto sa dakbayan. Ang Kapitolyo mogahin og P3 million alang sa Sinulog 2020.
Gawas sa pinansyal nga ayuda, giabisohan na usab ni Garcia ang Provincial Health Office (PHO) nga mo-standby atol sa Sinulog ang mga doktor, nurses ingon man ang mga ambulansya sa probinsya.
“We appreciate all the support that the City Government had extended to the Provincial Government last year. Mao na nga karon event naman sad ni sa Cebu City Government, we will be extending our support as well. The best way we can do that is through financial help. Mas gamit man, mas dako og gamit nila,” matod ni Garcia atol sa pakighinabi sa mga tigbalita, Martes, Enero 7.
Mipahibaw na usab si Garcia nga mosayaw kini sa Sinulog ritual showdown kauban sa contingent sa Siloy Festival sa Alcoy. Naghuna-huna na usab karon ang gobernador nga mosakay sa Sinulog Float usab niini.
Iya usab gipahibaw nga lakip sa mga mosayaw kauban niya mao ang mga bokal sa probinsya sama nila ni Tata Salvador ug Glenn Soco.
Mopasundayag usab ang mga Department heads sa Kapitolyo. (ANV)