KAPULISAN sa dakbayan sa Sugbo andam na alang sa Walk With Jesus, Huwebes, Enero 9, diin gibana-bana nga kapin sa 700 ka mga personnel sa Philippine National Police (PNP) ang ipakatap aron mobantay sa prosesyon.
Libo-an ka mga debotong Katoliko ang gipaabot nga mosalmot sa maong relihiyusong kalihukan nga kabahin sa pagsaulog sa Sinulog Festival.
Si Police Colonel Engelbert Soriano, ang officer in charge sa Cebu City Police Office, mibutyag nga ipakatap gilayon ang mga uniform personnel sa kadalanan lima ka oras sa dili pa sugdan ang prosesyon.
Iyang giklaro nga gawas sa 330 ka pulis sulod sa Basilica del Santo Nino, adunay laing 700 ang idestino niini nga mobantay sa rota sa prosesyon.
Subayon una sa kapulisan ang rota uban ang K9 unit sa Police Regional Office 7 ug sa Philippine Drug Enforcement Agency sa dili pa sugdan ang prosesyon aron pagsiguro sa kahapsay ug kalinaw.
Molusad usab silag clearing operation diin ilang hawanan ang sidewalk aron malikayan ang stampede kung ugaling magdasok na ang mga tawo.
“The whole stretch nang procession route ipa-panel namin, yung last walk through namin with the DPWH (Department of Publick Works and Highways) and councilor (Philipp) Zafra, sinabi nila talaga iki-clear lahat yun for the meantime even though selling religious articles iki-clear daw muna,” matod ni Soriano.
Samtang gisaka na usab sukad gahapon ang alert status sa kapulisan sa dakbayan gikan sa normal ngadto sa full alert status.
Gipasabot hinuon ni Soriano nga wala pa silay nadawat nga hulga sa kagubot atol sa prosesyon.
Tanang patrol cars sa Mobile Patrol Group ug sa mga police station ipakatap usab niya aron daghan ang mo responde kung adunay alarma.
Giawhag lang ni Soriano ang mga deboto nga bantayan usab ang ilang kaugalingon ug dili magtulod-tulod inig abot na sa ganghaan sa Basilica Menore del
Santo Nino.
Hugot usab nga i-monitor sa mga personnel ang sulod sa simbahan sanglit modasok usab ang mga tawo nga magpaabot sa imahen sa Batang Balaan. (AYB)