GITUGOTAN ni Mayor Edgardo Labella ang street party ug ubang klase sa kalingawan ug pag-inom og ilimnong makahubog, apan kinahanglan adto kini mahimutang lapas 100 metros gikan sa Sinulog route karong Enero 19.
Sa miaging tulo ka tuig ubos sa administrasyon ni kanhi mayor Tomas Osmeña, gitugotan ang samang kalihukan apan lapas sa 300 metros gikan sa Sinulog route.
Karon, gipadul-an ni Labella gumikan usab sa awhag sa katawhan nga gustong maglingaw.
“Yes, there is (a street party, shows, concerts etc) as long as it is beyond the 100-meter radius from the Sinulog route and within 100 meter radius, there should be no alcoholic drinks,” padayag ni Labella atol sa press conference kagahapon.
Ang mayor nagkanayon nga adunay bug-at nga silot sama sa pagkanselar sa ilang mga Mayor’s Business Permit.
Posible pang mag-atubang og kiha sa korte ang mga establisemento nga makalapas.
Dugang ni Labella nga adunay duha ka bus nga giandam ang City Government nga maoy magsilbing prisohan sa mga hubog nga magpabadlong.
Karong Lunes, ang mayor nga maoy over-all chairman sa Cebu City Sinulog Governing Board, mopatawag og tigom sa kapulisan, military ug ubang ahensya sa gobyerno lakip na ang mga organizer ug kalingawan ug mga business establishment owner sanglit sa di pa sila maka-operate, kinahanglan silang mokuha og special permit. (PAC)