5 ka BOD gitudlo ni Labella

NITUDLO na og lima ka board of directors (BOD) sa Metro Cebu Water District si Mayor Edgardo Labella nga maoy mohulip sa lima nga iyang gitangtang niadtong Oktubre 15 gumikan sa diskuntento ug pagkawagtang sa iyang pagsalig ug kumpyansa.

Usa sa gitudlo mao si kanhi Cebu City Councilor Atty. Jose Daluz III, hulip kang Atty. Cecilia Adlawan sa professional sector, kansang termino nagsugod niadtong Enero 6 hangtod sa Disyembre 31, 2024.

Laing gitudlo mao si Atty. Francisco “ Frank” Malilong, hulip kang Joel Mari Yu isip representante sa education sector, kansang termino molungtad hangtod Disyembre 31, 2022.

Ikatulo nga gitudlo ni Labella mao ang kanhi mayor sa dakbayan sa Sugbo nga si Atty. Alvin Garcia, amahan ni City Councilor Raymond Garcia, kinsa nirepresentar sa women sector hulip kang Atty. Procopio Fernandez. Ang iyang termino mapupos karong Disyembre 31,2020.

Ikaupat mao si magpapatigayon Miguelito “Mike” Pato, kinsa gituboy sa Mandaue Chamber of Commerce and Industry sa business sector hulip kang kanhi Cebu City councilor Augustus Pe Jr., kansang termino molungtad hangtod Disyembre 31, 2024.

Ang ikalima mao si Atty. Manolette Dinsay, chief legal counsel ni Cebu Governor Gwendolyn Garcia. Siya maoy nihulip kang Atty. Ralph Sevilla sa sivic sector, kansang termino molungtad hangtod Disyembre 31, 2022.

Si Daluz nga nahinabi sa Superbalita Cebu niingon nga ila nang naduso ngadto sa management sa MCWD ang kopya sa ilang appointment. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph