SA IKADUHANG sunodsunod nga katuigan, ang Central Visayas Regional Athletic Association (Cviraa) multi-sporting meet ipahigayon sa Dumaguete City sa sunod buwan.
Ang defending champion Cebu City mao gihapon ang makonsiderar nga labing lig-ong puwersa sa kompetisyon nga nagsilbeng qualifiers alang sa Palarong Pambansa.
Sa miaging tuig, ang Cebu City nakahakot og 78 gold medals, 59 ka mga silver ug 76 ka mga bronze aron patigbabawan ang kompetisyon nga gilangkuban og 19 ka mga division.
Nagsunod ang Cebu Province nga adunay 46-64-76 medal tally.
Ang kasinatian sa Dumaguete City sa pagpadagan sa kompetisyon gilauman nga ilahang magamit alang sa ilahang pag-host sa 11th Association of Southeast Asian Nations (Asean) School Games sa ulahing bahin ning tuiga. (RSC, ESL)