KADAGHANAN sa mga boksidor hilabi na sa mga adunay dakong potensyal nga makakulit og dakong pangalan, daw mahugno ang ilang kalibutan sa higayon nga masinati niini ang labing una nilang kapildihan.
Apan alang kang Jhack Tepora, nakahatag lang kini kaniya og dugang kadasig nga mas mokayod pa og maayo alang sa padayon niyang paggukod sa iyang pangandoy.
Nagkanayon si Tepora, 24, nga dali ra niyang gilubong sa kalimot ang iyang nasinating 1st round knockout nga kapildihan batok kang Colombian Oscar Escandon sa miaging buwan sa sa Toyota Arena sa Ontario, California.
Gipasabot ni Tepora nga niining puntoha, nagtutok na sa iyang unahan sa tinguhang makabangon gikan sa dakong kapakyasan.
“Wala man ko ma-discourage kay daghan man ang nagsuporta ug nagdasig nako. Gusto ko nga makabawi, gusto ko makabangon ko atong pagkapildiha,” matod ni Tepora sa pagpakighinabi ning mantalaan.
Gitataw ni Tepora nga nataymingan lang gyud siya og usa ka antimanong kumo ni Escandon (25-5, 18KOs) nga miigo sa iyang gusok hinungdan nga wala na siya nakabangon human sa 10 ka mga ihap sa referee.
“Delayed reaction man to. Gisuway nako’g antos pero grabe ka sakit unya dili ko makaginhawa maong wala nako nakabangon,” dugang ni Tepora, kinsa natagak sa 23-1, 17KOs nga rekord.
Matod ni Tepora nga malipayon siya nga wala nawad-an og pagsalig kaniya ang nagdumala kaniya nga mao ang MP (Manny Pacquiao) Promotions ug gihatagan dayon siya’g laing kahigayunan nga makabangon gikan sa premiro niyang kapildihan.
Asoy ni Tepora nga mismong si MP Promotions president Sean Gibbons ang misulti kaniya nga aduna siya’y laing away sa ulahing bahin karong Marso.
“Molarga ko’g balik sa Amerika karong February 1 aron mag-training kay naa ko’y away sa hinapos sa Marso. Katong pagkapilde nako, lesson learned to nako,” matod ni Tepora. (ESL)