Migallen: Clottey nagpakulata o gikulata?

BORING, boring, boring...

Kini maoy sagad madungog nato nga mga komentaryo human sa away ni Manny Pacquiao ug Joshua Clottey niadtong Dominggo didto sa Cowboys Stadium sa Dallas, Texas.

Boring tungod kay wa moabot ang gipaabot sa kadaghanan nga mao ang knockout nga kadaugan ni Pacquiao. Boring tungod kay sukwahi sa mga nangagi niyang away, si Clottey wa makapanumbag ug daw sama lang sa usa ka punching bag nga gimakmak og maayo ni Pacman.

Sa akong kaugalingong panahom, boring man tuod ang maong away kay one-sided man ang atong makita, apan sukwahi sa uban, gikan sa first round hangtod sa katapusang round, sa pagkatinuod lang grabi ang akong gibati nga kakulba ug kahinam.

Pasayloa nga akong i-debate ang komentaryo sa uban nga si Clottey way tinguha nga modaog sa maong away ug nisaka lang kini sa ring nga nagpakulata ug aron mokubra sa iyang $1.5 million dollar nga premyo (uwahing kalambuan gisaka ngadto sa $3 million tungod sa kadaghan sa mitan-aw).

Directly unfair kini alang ni Clottey tungod kay kon ang pagkobra lang sa premyo maoy iyang katuyoan mahimong moyaka na to siya og mosurender ug di pa paabuton mga moabot og 12 ka rounds aron lang siya magpabun-og. Indirectly unfair usab ni Pacquiao kay abi pa lang wa nila preparadohi og maayo ang estelo ni Clottey.

Taliwala sa mga makusog nga kumo nga nidapat kaniya, giagwanta kini ni Clottey kay siya nagtuo nga moabot ra ang higayon nga makatayming siya o kaha sa pamasin nga tingali og maluya si Pacquiao.

Apan wala kini mahitabo kay grabi ka preparado ug kondisyon si Pacquiao ug sa samang higayon nisamot og kamaayo ang istelo sa Pambansang Kamao. Gusto unta ni Clottey nga mobawos ni Pacquiao apan maglibog siya kay kalit lang kining mawala sa iyang atubangan.

Sa katapusang duha ka round, mismo si Buboy Fernandez, assistant coach ni Freddie Roach, nakamatikod nga nagpabilin pa gihapon ang kusog ni Clottey ug di kini angay ka kompiyansaan hinungdan nipahimangno kini ni Pacquiao nga padayong mabinantayon. Ug tuod man, Clottey’s wish for the right time at the right moment did not come, until the final bell sounded.

So, sa laktod nga pagkasulti, si Clottey wa magpakulata kon dili nahawngan lang gyud siya sa kamaayo, kakusog ug kalagsik ni Pacquiao nga di niya matugbangan hinungdan nga siya nakulatahan. This is fair to Clottey, fair to Pacquiao.

******

By the way, pasalamat ngadto ni Cebu City councilor Jack Jakosalem sa pag-imbitar kanato nga adto kita niya patan-awon sa Parklane International Hotel (atbang sa Ayala) sa pay-per-view sa maong away diin didto usab ang atong mga kauban sa buhat, atong higalang si Super Bobby Nalzaro ug Vice Mayor Rama. Thanks, Jack.

(junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph