SAMA sa napagngan og kahayag ang mga sakop sa grupo nga Lesbian, Gay, Bisexual, Transgender and Queer (LGBTQ) human ibasora sa Supreme Court ang Motion for Reconsideration ni manlalaban Jesus Nicardo Falcis III sa rason nga wala kini maghatag og igo nga hinungdan ngano nga usbon sa korte ang ilang pagbasora kaniadtong Septiyembre sa miaging tuig.
Duha ang akong nakita nga sayop sa maong kiha.
Wala mosubay si Falcis sa balaod bahin sa 'hierarchy of courts' tungod kay mideretso man siya dayon og kiha didto sa Supreme Court. Angay unta nga didto una siya mo-file sa ubos-ubos nga mga korte sama sa RTC.
Ikaduha, wala niya makombinsir ang korte nga nalapasan siya sa iyang katungod og ingon man, wala niya mahatagi og katin-awan ang korte og ngano nga tagdon man ang iyang kiha.
•••
Buyno, miuyon ang korte sa rason nga mismo ang Philippine Constitution wala maghatag o magdili sa kasal tungod sa 'sex, gender, sexual orientation o kaha, gender identity o expression.'
Kon basehan kining maong probisyon sa Philippine Constitution, klaro kaayo dinhi nga wala ihikaw ang kasal ni bisan kinsa ngadto ni bisan kinsa, pwede gani magpakasal ang mga pari ug mga madre.
Ang nakababag lang ang balaod sa Family Code of the Philippines nga nag-ingon nga ang kasal alang lamang sa usa ka lalaki ug babaye.
Buot ipasabot, walay luna sa maong kasal ang susama nga lalaki o susama nga babaye.
•••
Samtang dili pa usbon ang balaod sa Family Code of the Philippines, dili gyud mahimo ang kasal nga 'same-sex' o parehas nga lalaki o babaye.
Mao kini hinungdan nga miingon ang Supreme Court nga adto ang kombati niini didto sa kongreso og dili sa mga korte.
•••
Uyon ako sa maong hukom.
Dili pa mahimo nga magpakasal ang mga sakop sa LGBTQ samtang dili pa mausab ang Family Code of the Philippines.
Kon gusto gyod sila nga makasal, ang angay nilang buhaton mao ang pagpasabot sa mga sakop sa kongreso nga angay usbon na kini kay mao kini husto nga buhaton.
Og mao na sab kini ang gihimo didto sa ubang mga nasod sama sa America.
•••
Nagtuo ako nga nasayod na daan si Falcis nga lisod kini buhaton. Nagtuo seguro si Falcis nga mas dali mapasabot ang 15 ka mga sakop sa Korte Suprema kay sa tanang mga sakop sa House of Representatives ug ang Senate. Labi na kay mga politiko kini og magsakay-sakay lang sila sa lakat sa panahon.”
Nasayod sad si Falcis nga dakong supak ang Simbahang Katoliko ug ubang mga relihiyon sa maong plano nila. Hasta ang mga katawhan dakong supak sa maong plano.
Gamay pa sa mga ginikanan ang andam nga modawat nga ang ilang anak babaye maminyo sa usa ka babaye o kaha, ang ilang anak lalaki maminyo sa sama kaniya nga lalaki.
Mao kini mga hinungdan ngano nga lisod pa isuksok sa atong alimpatakan ang kasal nga “same sex.”
•••
Unsa may mahitabo karon nga duna nay 'finality' ang maong kaso nga gisang-at ni Atty. Falcis?
Mahimo nga dunay laing grupo nga mosang-at sa lain na usab nga kaso pero sundon na ang mga reglamento nga gibatbat sa kaso ni Falcis.
I-agi usa sa Regional Trial Court ang maong kaso og dili ideretso sa Supreme Court. Bahala og dugay mahuman ang pag-resolba sa maong kaso.
Samtang naghulat sa maong kaso, kadtong dunay pagmahal sa usag-usa nga mga sakop sa LGBTQ nga gusto magpakasal, ila usa nga ipakita nga bisan wala pa sila makasal, malipayon ug malinawon sila sa ilang panagtipon. Ilang ipakita nga dunay bug-at nga mga rason nga angay dawaton na sila sa katilingban.
Dili sila magpakita sa rason o hinungdan nga kwestiyunon ang ilang panagtipon tungod kay gubot o pirming dunay lalis. Nindot usab nga ilang ipakita nga mamahimo silang ehemplo sa ilang katilingban bisan kon parehas silang lalaki o babaye nga nanag-ipon.