Editoryal: Baha, trapiko sa Lapu-Lapu

MASULBAD kaha ni Mayor Junard “Ahong” Chan ang dugay nang problema sa daling pagbaha sa pabunok sa uwan ug nagkagrabe nga kahimtang sa trapiko sa dakbayan sa Lapu-Lapu? Pero, maayo nga gitumbok sa mayor nga prayoridad niya ang pagsulbad sa naasoy nga problema ning tuiga.

Ang problema sa daling pagbaha konektado sa problemado o walay tino nga sistema sa drainage, diin komon nga problema sa tanang dakbayan ug kalungsoran sa Metro Cebu. Buot ipasabot nga walay bili ang paningkamot sa usa ka local gonernment unit (LGU) kon walay koordinasyon sa ilang silingang LGUs.

Mao kini ang naghatag og igong importansiya sa plano nga pagtukod sa usa ka hunta nga modumala sa koordinasyon sa mga LGU sa Metro Cebu sa pagpatuman sa ilang mga proyekto ug mga programa nga isipong usa lang ug mapaspas ang gintang sa koardinasyon, dili lang sa drainage, trapiko, basura, seguridad ug ubang isyu. Apan damgo pa lang kining tanan human wa pa magkauyon ang hingtungdang LGUs.

Hinuon, ang nakalahi sa Lapu-Lapu uban sa lungsod sa Cordova human nahimotang kini sa isla sa Mactan. Mas sayon ang koordinasyon sa duha lang ka LGUs ang nagsikit sa ilang proyekto sa inpranstraktura sama sa drainage system. Dili komplikado ang burukrasya.

Kon matuman ang saad ni Chan, bisan dili hingpit mahuman, segurado nga mohatag kini kaniya og dakong bintaha ug dakong posilidad nga magsubli sa pagkapili nga mayor sa mosunod nga eleksiyon. Nasayod kita sa kadako ug komplikado sa mga problema nga dili hingpit masulbad sa usa lang ka termino sa piniling pangulo sa LGU. Kon masuta nga walay kalamboan taliwala sa panaad sa mayor, makaingon kita nga “Goodbye, Ahong.”

Ang mga piniling opisyal mas epektibo ug magbinantayon sa serbisyo pinaagi sa atong pagsuporta ug pagpakabana.