COLORFUL pa sa parol sa Barangay Pagatpat ug Barangay 22 ang ilang mga pahiyom kini human nga nasakmit ang kampyeon sa managlahing kategorya sa Indigay sa Parol 2019 niadtong bulan sa Disyembre ug ang awarding gipahigayon atol sa pagpakayab sa nasudnong bandila sa city hall.
Dunay anaa sa kapin 20 ka mga partisipante sa maong Indigay sa Parol nga naka-display sa Plaza Divisoria niadtong bulan sa Disyembre sa nilabay nga tuig.
Ang tulo ka kategorya mao ang National Government Agency,Business Establishments along Divisoria ug sa Barangay nga dunay duha usab ka kategorya nga urban ug suburban.
Nakuha sa Commission on Audit (COA) ang 3rd place nga dunay premyo nga P20,000 ug trophy; Philippine Port Authority (PPA) ang 2nd place (P30,000) ug ang champion mao ang Department of Education (DepEd) nga dunay premyo nga P50,000.
Sa Business establishments 3rd place ang Chowking, 2nd place ang Cepalco, ug champion ang Expressions.
Sa urban category nasakmit sa Barangay 38 ang 3rd place; Barangay 26 ang 2nd place ug Barangay 22 ang champion nga nakadawat sa premyo nga P75,000, P100,000 ug P150,000.
Samtang sa suburban Barangay nasakmit usab sa Barangay Puntod ang 3rd place; Barangay Carmen ang 2nd place ug champion mao ang Barangay Pagatpat sa susama nga mga papremyo.
Gipasalamatan usab ug gidayeg sa City Administrator Teodoro Sabuga-a ang City Tourism sa mga kalihokan sa siyudad sa nilabay nga kasaulogan sa pasko.
“Congratulations sa City Tourism, gwapo kaayo ang atong Christmas celebration,” matud ni Sabuga-a.
Nasayran nga ang Indigay sa Parol ginahimo na matag tuig diin kompetisyon kini sa mga desinyo sa parol nga ginama sa recyclable materials.
Gihimo usab ang unang hugna sa judging niadtong Disyembre 9 samtang ang ikaduhang hugna niadtong Disyembre 16.