PUNO sa kasadya ug kahiusa sa kalungsoran ang unang adlaw sa pagbukas sa Kuyamis Festival 2020.
Gipangunahan kini ni Misamis Oriental Governor Bambi Emano ug Provincial Tourism head Atty. Jeffrey Saclot.
Atol sa pagbukas niini adlawng Lunes, Enero 6, gisugdan sa usa ka santos nga misa ug programa.
Misunod dayon ang first judging sa mga Kuyamis Booth kung asa moabot 19 ka mga lungsod ang misalmot.
Ang mananaog niini modala og P200,000 cash nga kantidad ug balor P1 milyon sa proyekto sa ilang lungsod ang maangkon.
Ang ikaduhang ganti mokantidad sa P150,000, ang third place anaa sa P100,000 ug P50,000 ang consolation prize.
Mga kalungsoran nag sig iya sa paningkamot nga mapasigarbo ang ilang nagkadaiyang lungsod ug gidisplay ang ilang abot ug mga hinguhaan.
Usa ka Cultural and Arts Exhibit ang gibuksan sab niadtong adlawng Lunes sulod sa Centrio Mall nga gipangunahan sa chairman committee sa Tourism, Board Member Saysay Emano.
Si Emano nipasabot nganong gihatagan og pagtagad ang Cultural and Arts Exhibit tungod kay daghan sa Misamisnon ug Kagayanon ang aduna gyod og talento sa pagpinta, ug adunay kasingkasing sa kultura sa Filipino nga angayan dili mawala hangtod sa sunod pa nga henerasyon.
Pagka alas 4:00 sa hapon, giinagurahan ang Healing Pool nga makita sa Lourdes Bay, Binuangan, Misamis Oriental.
Laing atraksyon na usab kini sa mga turista o dumudoong sa lalawigan. Mahatagan sab og dugang kinitaan ang lungsod labina kini nga lungsod anaa sa ika sixth-class municipality.
Pagkagabii, hudyaka ug pasikatay sa mga nagkalainlaing talento ang gipakita sa mga Misamisnon sa Unang Distrito gikan sa lungsod sa Magsaysay paingon sa lungsod sa Balingasag.
Gipasabot ni Governor Emano nganong gipahigayon kini sa kalungsoran.
"Atong gidala ang atong kalihokan dinhi sa matag lungsod kay kung didto kini nato saulogon sa kapitolyo pait nga dili makaselebrar ug dili masayang atong katawhan sa lungsod nga adlawng natawhan usab sa atong lalawigan," matud niya.
Gipasabot sab niini kung unsay kasaysayan sa Kuyamis nganong iyang gipalambo kini ug gisugdan ang festivities niini.
Kini gumikan sa kolor yellow nga lubi nga gagmay apan kung matilawan labihan ang katam-is.
Daw kaniadtong mibisita ang mga kastila sa probinsya kining lubi ang gitunol kanila.
"Pag-abot sa Kastila sa atong lalawigan, tungod kay boutan, maabi-abihon ang atong katawhan ilang gihatagan og putot sa lubi nga ginganlan og Kuyamis. Apan dili kini malitok sa mga kastila gawas sa pulong nga "Misamis" ug dinhi maoy sinugdanan sa pagbunyag sa maong pangalan dinhi sa lalawigan," matud ni Emano.
Aminado kining dako na og pundo ang nabubo sa turismo sa lalawigan apan daw wala kini niya gisayapan tungod kay sa umaabot ang katawhan gihapon sa lalawigan ang mabulahan.
Malaumon lamang si Emano nga unta ang mosunod kaniya nga gobernador ipadayon ang Kuyamis Festival kay sa pito ka tuig na niini layo na og naabtan ug naila na ang selebrasyon dili lang sa lalawigan apan gawas ug
sulod sa nasod.