GI-AGHAT sa kagamhanang lokal ang katawhan nga magdala og “eco bag” nga masudlan sa ilang gipamalit human hingpit na nga gi-implementar ang plastic bag regulation sa dakbayan sa Cagayan de Oro ning tuig 2020.
Base sa City Ordinance 13378-2018 o Integrated Ecological Solid Waste Management Ordinance gipasabot ni Engr. Armen Cuenca, tsirman sa City Local Environment Office (Clenro) nga gidili ang mga ambulant vendors, kan-anan, pharmacies, fast food outlets, ug sari-sari stores sa kamerkadohan sa pagsulod sa ilang mga baligya sa plastik gawas sa karne ug isda.
Gidili usab pagsulod sa laing plastik ang mga wet goods nga duna nay mga putos o packaging.
Gibutyag ni Teodoro Sabuga-a, City Administrator, nga kini ang ikaduha nga hugna ug tumong lamang niini alang sa kinaiyahan ug kaayohan kini sa tanan.
Nanghinaot usab kini nga masabtan sa tanan ug magdala na lang og eco bag aron nga di na makaperwisyo ug makatabang pa aron nga dili na makasinati og pagbaha sa dakbayan.
“Mao na nga I hope nga kita sab sa atong kaugalingon nagbaton sab nga magdaladala nata og eco bag aron nga dili nata makaperwisyo,” matud ni Sabuga-a.
Giklaro usab niini nga base sa ordinansa regulasiyon lamang kini diha sa paggamit og plastik.
“Actually, wala may ban for selling, ang using man kay mao man ang gisulti sa ordinance,” dugang pa.
Gipahimangnoan ang tanan nga mosunod niini nga ordinansa aron nga malikayan ang mga multa labi na gyud nga gisugdan na usab ang pag-isyu og Ordinance Violation Receipt dinhi sa dakbayan.