GILAOMAN ang pagdoble sa ihap sa sa mga deboto sa Itom nga Nazareno nga moapil sa prosisyon karong Enero 9 dinhi sa dakbayan sa Cagayan de Oro.
Sa nilabay nga tuig, kapin sa 200,000 ka mga deboto ang niapil sa prosisyon apan karon gilaoman nga mas modaghan pa, sumala ni Police Colonel Erwin Meneses, Deputy City Director for Administration sa Cagayan de Oro City Police Office.
Samtang gibutyag ni City Administrator Teodoro Sabuga-a nga sa sitwasiyon karong panahona sa Manila nga grabe kadaghan sa mga deboto, mas pilion na sa uban nga dinhi sa dakbayan sa Cagayan de Oro moapil sa prosisyon.
“With the situation now in Manila daghan na gyud kaayo didto mga devotees. I think ang trend karon murag dinhi na sila gapanganhi even taga Visayas dinhi na sila gapanganhi how much more sa uban mas duol mas gamay ang gasto kung naa sila sa Cagayan,” matud ni Sabuga-a.
Seguridad
Gumikan na usab sa gilaomang pagdagsa sa daghang mga deboto rason nga gipangandaman usab sa mga otoridad ang paghatag og seguridad sa katawhan ilabi na atol sa traslacion sa Itom nga Nazareno.
Giingong daghang kapulisan usab ang ipakatag atol sa maong kalihokan.
“More or less mga 1,000, in fact more because there are still personnel nga atong gi request pending approval pa sa camp crame, just like the recruits nga naa sa regions training center sa Patag ug apil na ang officers on training gihapon,” matud ni Meneses.
Samtang gawas sa kapulisan lakip usab nga ipakatag atol sa kalihokan mao ang mga kasundalohan ug mga Oro Barangay Tanod.
“Ever since na-create ang Oro Barangay Tanod gi-tap gyud na sila as very important nga force multiplier definitely 1-40 ug naay daghang mga Barangay pud diri sa rural ug urban area nga mo-complement,” matud ni Engr. Jane Docallos, Director sa Department of Interior and Local Government (DILG).
Gidugang pa niini nga gihan-ay pa ang mga Barangay kalabot na niini apan gatosan ang mga Tanod nga gikinahanglan niini nga kalihokan.
“Definitely we need around 600 barangay tanods to augment other than the barangay tanods also we are tapping the army service also to help us,” dugang pa.
Liquor ban
Samtang puasa una ang angayang buhaton sa mga buot moinom og ilimnong makahubog sugod karong adlawa petsa 8 mga alas 5:00 sa hapon hangtod na sa traslacion sa itom nga Nazareno.
Nag-isyu na og executive order si Mayor Oscar Moreno kalabot na sa liquor ban.
Gibutyag ni City Administrator Teodoro Sabuga-a nga ginadili ang pagbaligya ug pag-inom ilabi na sa ruta sa traslacion sa Itom nga Nazareno.
Gidugang pa nga mas maayo man usab kini tungod kay resulta niining puasa mao man ang maayong panglawas.
“Kay kani nga devotion nato pasalamat mo nga makapuasa kamo good health ang result sa inyong puasa,” dugang niini.
Gi-aghat usab ang mga mabdos, katigulangan, ug persons with disability (PWDs) nga dili nalang mouban sa maong traslacion.
Ginadili usab ang pagdala og payong, pagsul-ob og kalo, itom nga antipara, backpack, hait nga butang, drone, illegal nga druga ug ilimnong makahubog, alahas, tsinelas ug hooded jacket, canned goods ug botelya lakip ang vendors ang wala usab gitugotan.