SUBO ang mga Angkas drivers human gipahunong ang operasyon sa Angkas dinhi sa dakbayan sa Cagayan de Oro.
Subay niini, lima ka mga motorsiklo nga sakop sa grupo sa Angkas ang kasamtangang naka-impound sa buhatan sa Land Transportation Franchising and Regulatory Board (LTFRB) human lakip sa nakalapas sa balaod.
Gibutyag sa LTFRB nga dili apil ang dakbayan sa Cagayan de Oro sa mga pilot areas sa Angkas, ug ang Luzon ug Visayas lamang ang gitugotan sa LTFTB Central Office sa kasamtangan.
Human sa operasiyon sa LTFRB-Northern Mindanao niadtong Disyembre 2019, gibutyag ni Eddie Diamla, officer-in-charge (OIC)-Chief Transportation Development Officer sa LTFRB-Northern Mindanao, nga nagsaad ang kadagkoan sa Angkas dinhi sa dakbayan nga hunongon una ang ilang operasiyon.
"Wala ang ilang operation karon kay ga-promise ang ilang manager gikan sa pagdakop atong December di na sila mo-operate hangtod wala sila'y mapakita nga papeles gikan sa Manila," matud ni Diamla.
Gidugang pa nga dili tugtan sa LTFRB nga magdagan ang mga Angkas dinhi sa dakbayan kung wala'y panugot sa central office ug dili lamang Angkas, apan ang tanan nga kolurom nga sakyanan.
"Kung wala sila'y authority nga mapakita coming from LTFRB-Central Office, dili na mi mosugot nga mag-operate sila. Pero not only in Angkas group including lahat ng colurom unit, lahat among gipangdakop," dugang niini.
Samtang gikasubo usab kini sa mga Angkas driver nga ang pagmaneho lamang ang ilang panginabuhian.
Gani dunay mga nanggawas nga page sa social media sama sa "Save #AngkasCDO Strong Passengers and Bikers," "Angkas Barkada CDO group" ug uban pa diin gipagawas sa mga naapektohan niini ang ilang mga sentimento kalabot na sa pagpahunong sa operasiyon sa Angkas.
"Hi to all passengers and biker. Please like our page and share. This can help para ipakita nato nga maayu ang serbisyo ni Angkas sa CDO and we don't want to stop operation ni CDO diri. Kay dako kayo og tabang," sa pahayag gikan sa page.
Dunay pipila usab ka mga drayber ang dako gyud ang kaguol ug kabalaka kung unsa nalang ang ilang mahimo ilabi na kung asa makakita og laing panginabuhian.