SIKOP ang giingong "scammer" pinaagi sa warrant of arrest mga alas 9:40 sa buntag niadtong Miyerkules, Enero 8, 2020, sa Abellanosa Street, Barangay 17, sa dakbayan sa Cagayan de Oro.
Sikop si Pablito Pagaspas, 40, negosyante, minyo ug residente sa nahisgutang dapit.
Dunay nakaung-ong nga warrant of arrest sa kasong estafa nga dunay criminal case #R-CDO-19-03916 si Pagaspas ug mokabat sa P60,000 ang girekomendang piyansa alang sa temporaryong kagawasan.
Subay sa report nga ang suspetsado giingong nag-post sa iyang Facebook account og investment nga sulod sa usa ka semana ang P1,000 mamahimong P1,700.
Gidugang pa nga niduso og reklamo sa buhatan sa National Bureau of Investigation (NBI) ang mga biktima ilabi na nga wala matuman ang giingong pagtubo sa kwarta base sa giingon sa suspek rason nga na-isyuhan og warrant of arrest.
Kahinumdoman nga nasikop si Antonnette Sestoso kinsa giingong founder sa investment scam sa Facebook nga "P1,000 turns to P1,700 in just 10 days" niadtong Marso 2019 ug gilakbitan niini ang pamilyang Pagaspas.
Nasayran nga ubay-ubay ka mga biktima ang nagreklamo sa NBI kaniadto ug tunga sa milyon nga kantidad ang giingong nakuha sa mga suspetsado.