PIPILA ka mga dalan sa sentro nga bahin sa dakbayan sa Cagayan de Oro ang
sirad-an paglabay sa mga deboto nga mouban sa prosisyon karong adlawa, Enero 9, atol sa kapistahan sa Itom nga Nazareno.
Gibanabanang gatosan nga mga deboto ang modagsa rason nga gipangandaman usab ang mga kadalanan nga apektado o maagi-an sa prosisyon.
Gibutyag ni Engr. Nonito Oclarit, assistant department head sa Roads and Traffic Administration (RTA), nga susama gihapon ang traffic scheme nga ilang gihimo ug ang ruta nga agian ipasirado apan sa "progressive type" nga pamaagi.
"Naay mga dalan nga i-close nato labi na ang ruta gyud nga agian sa atong traslacion," matud ni Oclarit.
Kini nga mga dalan ang isarado: Fernandez Street gikan sa St. Augustine Cathedral paingon sa Velez Street, sangko sa bahin Recto Avenue ug gikan sa Licoan/Velez paingon na sa Osmeña Street.
"Atong proseso sa pagsirado niini progressive type ta. Di nato i-one time og close kung asa na ang ulo lugar sa traslacion. Naay certain distance nga ayha pa dayon ta mag-close sa unahan para nga dili tanto nga matanggong atong mga salakyan," dugang niini.
Rerouting
Temporaryo usab nga gipatuman ang rerouting sa agianan sa mga sakyanan atol sa prosisyon sumala sa gipagawas nga executive order ni Mayor Oscar Moreno.
"Yes, atong traffic scheme niini apil na ang temporary rerouting gibahin nato base sa atong executive order," matud ni Oclarit.
Giingong tanan nga westbound ug south bound nga sakyanan, pribado man o publiko, mahimo nga moagi sa Rotunda via Mastersons Avenue o Vamenta boulevard paingon sa Nazareth-Macasandig area.
Samtang sa east bound, mahimo sab moagi sa JR Borja Extension sa coastal road paingon sa portion nga bahin sa Corrales-Gaabucayan hangtod na sa Bayabas area ug Kauswagan.
Ang mga sakyanan usab nga moagi sa Recto Avenue pagsulod sa kasadpang bahin (west), mahimo nga moliko paingon sa tuo liko sa Capistrano labi na kung anaa na sa Licoan.