GISALINDOT sa hingpit sa Korte Suprema niadtong Lunes, Enero 6, 2020, ang petisyon nga tugotan nga magminyo ang lalake ug lalake ingon man ang babaye ug babaye dinhi sa Pilipinas.
Si SC Clerk of Court Edgar Aricheta niingon nga ang dismissal with finality sa petisyon alang sa same-sex marriage nagpasabot nga wa nay tugotan nga mosyon sa petisyon nga gipasaka ni Atty. Jesus Nicardo Falcis III.
Ang maong petisyon gi-dismiss sa Korte Suprema niadtong Septiyembre 2019. Ang maong isyu, matod pa sa Labaw’ng Hukmanan, angay nga iduso ngadto sa Kongreso.
Matod pa sa Korte Suprema, si Falcis (1) nakalapas sa lagda sa hierarchy of courts, (2) napakyas sa pagpakita sa usa ka actual justiciable controversy ug (3) way legal standing.
Gipasaka ni Falcis ang maong petisyon niadtong 2015 aron ipadeklarar nga nulo ang Articles 1 and 2 ug Articles 46 (4) and 55 (6), Family Code of the Philippines. Gilimitihan sa Articles 1 and 2 ang kaminyuon nga tali lang sa lalake ug babaye.
Ang Article 1, Family Code, nagkanayon, “Marriage is a special contract of permanent union between a man and a woman entered into in accordance with law for the establishment of conjugal and family life.”
Samtang ang Article 2, Family Code, nagkanayon, “No marriage shall be valid, unless these essential requisites are present: (1) Legal capacity of the contracting parties who must be a male and a female.”
Giklaro sa Article 1 and 2 sa Family Code nga ang kaminyuon tali lamang sa lalake ug babaye. Busa ubos niini di mahimong magminyo ang lalake ug lalake ingon man di makasal ang babaye ug babaye.
Ang Articles 46 nag-ingon, “Any of the following circumstances shall constitute fraud referred to in Number 3 of the preceding Article: (4) Concealment of drug addiction, habitual alcoholism or homosexuality or lesbianism existing at the time of the marriage.”
Ang pagkuha sa pagsugot nga magminyo pinaagi sa fraud o sa tikas o lingla usa sa mga hinungdan nga maanular ang kaminyuon ubos sa Article 45, Family Code. Ang pagtago sa homosexuality ug lesbianism giila nga fraud ubos sa Article 45. Sa maong balaod kinahanglan nga kini existing kon diha na sa panahon sa kaminyuon.
Samtang ang lesbianism ug homosexuality usa sa mga hinungdan sa legal separation ubos sa Artic;e 55 (6), Family Code. Apan si Falcis niingon nga ang Section 3(1) Article 15, 1987 Constitution, naghisgot lang og spouses – wa klaroha kon lalake ug babaye ra ba gyud.
(edbarrita@gmail.com)